Дьокуускай – Чукотка – Аляска – Канада – Нью-Йорк – Лондон – Франция – Германия – Дания – Швеция – Финляндия – Санкт-Петербург – Москва – Казань – Новосибирск – Иркутск – Чита – Тында – Дьокуускай – бу хорсун автоледилэр 80 күнүнэн сир шарын эргийиилэрин маршрута.

Кинилэр айаннарын 10 сылын ахсынньы саҥатыгар «Кругосветное путешествие якутских автоледи» диэн кинигэ таһаарыынан бэлиэтииллэр.

«Оччолорго, 2003 сыллаахха, ити дьиҥнээх авантюра этэ. Санааҥ көрүҥ: баар-суох техникабыт икки УАЗ массыына, айаммыт былаһын тухары бэйэбит өрөмүөннүүбүт. Биһиги тугу көрбүппүтүн үллэстиэхпитин баҕарбыппыт ыраатта – ол курдук экспедициябыт туһунан кинигэ суруйар санаа киирбитэ. Кинигэни бэлэмнээһин балтараа сыл курдук барда — дьүөгэлэрим ахтыыларынан, хаартыскаларынан, суруктарынан көмөлөстүлэр. Билигин бары кинигэ күн сирин көрөрүн кэтэһэбит», - диэн СИА-ҕа автор, айан кыттыылааҕа Лена Баишева сэһэргээтэ.

Кинигэ дневник курдук сурулунна, манна «хорсун санаалаах автоледилэр 50 кыраадыс тоһуттар тымныыга суола суох сирдэри уонна күүстээх буурҕаны туораабыттарын; киэҥ уонна сыыдам автобаннарынан ыра санааларыгар уйдаран айаннаабыттарын; хас биирдии биирдии чилиэнэ – солбуллубат сүһүөх буолбут ураты хамаанда, автоэкспедиция кэмигэр дьикти, сатаан быһаарыллыбат түгэннэр тустарынан» суруллар.

«Кругосветное путешествие якутских автоледи» кинигэни сүрэхтээһин ахсынньы саҥатыгар ыытыллыа, ол кэнниттэн атыыга тахсыа.