10 сыл буолан баран "бойобуой" дьүөгэлиилэр ити бэлиэ түгэҥҥэ анаммыт кинигэни сүрэхтээһиҥҥэ көрүстүлэр.

Дневник-кинигэни айан биир кыттааччыта Лена Баишева суруйда, манна бу тэрээһин туһунан биллэр да, биллибэт да түгэннэр киирдилэр. «Кругосветное путешествие якутских автоледи» кинигэни сүрэхтээһин республикатааҕы пресс-кииҥҥэ ыытылынна.

Айан 10 сылыгар уонна кинигэ тахсыытыгар анаммыт көрсүһүүгэ ити айан геройдара Оксана Новгородова, Наталья Румянцева, Анна Васильева, Вера Константинова уонна Лена Баишева эрэ буолбакка: кинилэр доҕотторо, чугас дьонноро — бары бу айаны тэрийэргэ көмөлөспүт, өйөөбүт дьон кэллилэр. Ыалдьыттар айан хайдах барбытын, болдьохторун, хонук, аһылык, виза боппуруостарын быһаарыыны уо.д.а. кэпсээтилэр.

«Мин бу кинигэни суруйарбар көмөлөспүт дьүөгэлэрбэр, бүгүҥҥү көрсүһүүгэ кэлбит дьоҥҥо махтанабын. Бу үлэни мин уон сыл дууһабар илдьэ сылдьыбытым, бу кинигэни икки сыл суруйдум. Миигин кытта бүгүн бииргэ айаннаабыт дьүөгэлэрим бааллар. Атын кинигэ геройдара: үгүһү көмөлөспүт Анастасия Божедонова, Валентина Кириллина уонна Эдьиий Дора манна эмиэ олороллор», - диэтэ бэйэтин киирии эҕэрдэ тылыгар автор Лена Баишева.

Официальнай эҕэрдэлэр эмиэ буоллулар: айан кыттыылаахтарыгар махтал суруктары Дьахтар парламентарийдар Кулууптарын уонна Ил Түмэн наукаҕа, үөрэххэ, культураҕа, иһитиннэрэр-биллэрэр информацияҕа уонна общественнай тэрилтэлэргэ сис кэмитиэт аатыттан Государственнай Мунньах депутата Марфа Филиппова туттарда.

Автоледи, Дьокуускайдааҕы куорат думатын депутата Алевтина Эверстова бэйэтин коллегаларын кинигэ тахсыбытынан эҕэрдэлээтэ уонна Дума наҕараадатын — түөскэ кэтиллэр бэлиэлээх бочуотунай грамоталары туттарда.

Үөрүүлээх түгэн кыттыылаахтара ордук махталларын биллиилээх эмчит Эдьиий Дораҕа эттилэр. Кинилэр айан кини алгыһынан уонна көмөтүнэн этэҥҥэ ааспытыгар бигэтик итэҕэйэллэр.

Уонна биллэн турар, сүрэхтээһин кыттыылаахтара, ыалдьыттара «Кругосветное путешествие якутских автоледи» кинигэни атыылаһар кыахтаннылар, кинигэ сыаната 999 солкуобай.