Саха сириттэн бу тэрээһиҥҥэ 10 киһи кыттар — СР дьахталларын Сойууһун тэрилтэтин бэрэссэдээтэлэ Валентина Кириллина, партия региональнай салаатын толорор кэмитиэтин салайааччытын солбуйааччы Анжелика Андреева, СР Ыччатын парламенын чилиэнэ Раиса Контоева, республикатааҕы "Саха сирин эдэр сааһа" общественнай тэрилтэ бэрэссэдээтэлин солбуйааччы Туяна Андреева уо.д.а.

Сүүрбэ сыл устата Санкт-Петербургдааҕы социальнай-экономическэй институт көҕүлээһининэн, "Аан дойдуну уларытар дьахталлар" конференция лидер-дьахталлары, политиктары, предпринимателлэри, учуонайдары, Россия регионнарыттан общественнай тэрилтэлэр салайааччыларын, КГС, Балтия, Европа уонна Хотугу дойдулар, Америка Холбоһуктаах штаттарын, Азия уонна Африка дойдуларын түмэн, правительстволарга уонна гражданскай обществоҕа демократия уонна аан дойдутааҕы гуманитарнай бииргэ үлэлээһиҥҥэ бырайыактары олоххо киллэриигэ туһалаах уопуту үллэстэргэ, сайдыыга тус алтыһыыларга көмөлөһөргө ананан үлэлиир.

Конференция сыала- көхтөөх дьахталлар аан дойдутааҕы уонна национальнай таһымҥа араас эйгэҕэ бииргэ үлэлээһиннэрин кэҥэтии.

2013 сыллаах конференция сүрүн темата - "Экономическэй уонна культурнай алтыһыыга дьахтар оруола"

Анжелика Андреева: Биһиги маннык тэрээһиҥҥэ кыттарбытыттан олус үөрэбит. Кырдьык, аныгы олоххо политика, искусство, культура, бизнес эйгэтигэр дьахтар оруола олус сүүнэ. Аан дойду бары муннуктарыттан кэлбит дьахталлары маннык бырайыактар аан дойдуну өссө кэрэ, үтүө уонна муударай оҥорорго көҕүлүүллэр. Конференция программата олус киэҥ уонна толору, онно биһиги барытыгар сылдьа сатыахпыт.