Саха Республикатын устун суолдьут таһаарыыны СР федеративнай сыһыаннаһыыларга уонна тас сибээстэргэ Министерство көҕүлээн таһаарда. Министерство салайааччыта Валерий Максимов этэринэн, “аныгы суолдьут Саха сирин имиджин көрдөрөр ураты кинигэ быһыытынан толкуйдаммыта, туристарга эрэ буолбакка, биһиги бизнескэ, регионнары уонна аан дойдуну кытта сыһыаннарбытыгар, культурнай сибээстэрбитигэр бииргэ үлэлэһэр дьоммутунуун алтыһарбытыгар туһаайыллар».

«Биһиги Республикабыт үгүс өрүттээх аныгытын көрдөрөр ураты кинигэни туттубут», – диэн бэлиэтээтэ миниистир.

Кинигэни оҥорууга биллиилээх фотографтар уонна трэвел-блогердар Сергей Карпухин, Сергей Доля, Иван Дементиевский, Олександр Чебан, Леонид Каганов уонна атыттар да үлэлэстилэр. Суолдьут страницаларыгар уопуттаах айанньыттар Саха сирин устун баар маршруттар уонна бэйэлэрэ сырыыларын тустарынан санааларын үллэстэллэр. Кинигэ уус-уран, тыыннаах тылынан суруллубут. Республика кэрэ-бэлиэ сирдэрин ойуулааһын таһынан, Саха сирин төрүт олохтоохторун үгэстэрин уонна олохторун-дьаһахтарын, күнүн-дьылын, кыылларын, үүнээйилэрин кэпсиир информацияларынан ситэриллибит. Манна музейдар, театрдар уонна гостиницалар аадырыстара телефоннара, куораттар уонна бөһүөлэктэр былааннара киллэриллибиттэр.

«Якутия. Современный путеводитель» кинигэни Москватааҕы PressPass издательство бэчээттээбит.

Кинигэни сүрэхтээһин Сочитааҕы Олимпиада кэмигэр олунньу 7-23 күннэригэр Рооссия Федерациятын регионнарын экспозициятыгар республика биир сүрүн тэрээһинин быһыытынан ыытыллыаҕа, диэн СИА-ҕа республика федеративнай сыһыаннаһыыларыгар уонна тас сибээстэргэ министерствотаттан иһитиннэрдилэр.