Бу иннинэ бастакынан Өлүөнэтээҕи холбоһуктаах пароходство суудуната иһэрин туһунан суруйбуппут эрээри, өрүс көмүөлүгэр хаайтаран, кинилэри “Двина” ситэн ааспыт. Суудуна хапытаана Олег Попов аара өрүскэ Сиинэ аннынан муус харыытыгар түбэһэн, икки күн устата тохтоон турбуттарын кэпсээтэ. Уопсайа 8 тыһ. тоннаттан тахса таһаҕаһы, тутуу матырыйаалын аҕаллылар. Дьиҥэр, анарааттан эрдэ айаннаабыттар эрээри, сорох сирдэринэн муус аһара элбэх буолан, бытаардыбыт дэһэллэр. Хараабылга уопсайа 8 киһи, ол иһигэр мотуруостар, техниктэр, хапытаан көмөлөһөөччүлэрэ бааллар.

Салгыы Саха Республикатын правительствотын вице-премьера Анатолий Скрыбыкин республика президенин эбээһинэһин быстах кэмҥэ толорооччу Егор Борисов эҕэрдэтин тириэрдэн туран: “Дьокуускайдааҕы өрүс пордугар таһаҕаһы бастакынан аҕалбыт экипаһы чиэстээһин, үөрүүлээх быһыыга-майгыга көрсүү үгэскэ кубулуйбута ыраатта. Урукку сылларга бастакы теплоход ыам ыйын 20 күннэрин кэнниттэн кэлэрэ. Бу сырыыга бары да соһуйдубут. Дьокуускайдааҕы өрүс порда сыл ахсын 750 тыһ. т кэриҥэ таһаҕаһы сүөкүүр, тиэйэр-таһар. Сайын устата үлэ тиргиллэн олорор. Бу республикаҕа аҕалыллар таһаҕас аҥара буолар”, -- диэтэ.

Мантан сайын аны күһүҥҥэ диэри уу транспорынан 1 мөл. 711 тыһ. т таһаҕас тиэллэрэ былааннанар. Аҕыйах хонугунан Бүлүү, Амма өрүстэринэн таһаҕаһы тиэммит бастакы суудуналар айанныахтара.