Сыл ахсын буоларын курдук ыам ыйын 15 күнуттэн улууска Доруобуйа декадата биллэриллибитэ. Тустаах тэрээһиннэр ыытылла тураллар. Өрөспүүбүлкэ үрдүнэн тарҕаммыт скандинавскай хаамыыны сэргээччилэр ахсааннара Ньурбаҕа эмиэ эбилиннэ. Нэһилиэктэргэ дьарыктанар бөлөхтөр хаампыттара ыраатта.

Ньурба куоракка скандинавскай хаамыы туһатын билбит дьон сарсыарда эрдэ уонна үлэ чааһын кэннэ микрорайоннарынан түмсэн дьарыктаналлар. Центральнай уокурукка дьарыгы чөл олох пропагандиһа, физиотерапевт быраас В. Афанасьев иилээн-саҕалаан ыытар. Бөлөх кыттыылаахтара организмы уһугуннарар зарядка кэнниттэн, хаамыы методикатын туһанан күҥҥэ ортотунан 2-3 км хаамаллар. Бу бөлөххо 50-70 саастаах дьахталлар дьарыктаналлар. «Хаамар олус учугэй, эппин-сииммит уһуктарга дылы буолар, улаханнык сылайбаппыт, бэйэбит кыахпытынан сылдьабыт», - диэн этэллэр хаамааччылар.

Доруобуйа декадатын чэрчитинэн улуус оскуолаларыгар туспа былаан быһыытынан үлэ барар, араас хабааннаах күрэхтэр, тэрээһиннэр ыытыллаллар. Оҕолор сааскы эрэ кэмҥэ буолбакка сылы быһа дьарыктаналлар, маассабай спорт көрүҥнэринэн үлүһүйэллэр. Улуус баһылыга Б. Попов оҕо-аймах түмсэр, актыыбынайдык сынньанар, бириэмэни туһалаахтык атаарар, элбэх позитивнай эмоциялары ылар сирдэрэ наадалар диэн тэрилтэ салайааччыларыгар, нэһилиэк баһылыктарыгар бэйэтин санаатын тириэрдибитэ.

Ол курдук, бу күһүҥҥүттэн саҕалаан нэһилиэктэргэ, Ньурба куоракка катоктар үлэлээтилэр. Элбэх оҕо, эдэр ыччат мустан актыыбынайдык сынньанар сирдэрэ буолбутун дьон бары бэлиэтии көрбүт. Катоктар тастарыгар хатааһылыыр муус горкалары оҥорбуттара кыра оҕо төроппүтүн кытта кэлэн аралдьыйара эмиэ хайҕаллаах суол. Нэһилиэнньэ ити хамсааһын салҕанара наада эбит диэн түмүккэ кэллэ, маассабай спорка тардааһын биир туһалаах өрүтэ буоларын бэлиэтээтэ, учууталлар, тренердэр, общественнай актыбыыстар оҕону кытары эрэ буолбакка, улахан дьону киэҥник хабан үлэлииллэрэ наадалааҕын сопсосто.

Чөл олоҕу тутуһуу, физкультуранан дьарыктаныы хас биирдии киһиэхэ тыынар салгын курдук наадалаах буоларын ситиһиигэ араас таһымнаах тэрээһиннэр, декадалар күүс-көмө буолаллара, торумнууллара саарбаҕа суох, диэн СИАҕа Ньурба оройуонун пресс-сулууспата иһитиннэрэр.