Ол курдук “Эллада” спорт-саалаҕа маассабай спорду тарҕатыы управлениетын тутаах специалиһа Айталина Третьякова скандинавскай хаамыы туһунан олохтоохторго кэпсээтэ.

Скандинавскай хаамыыны дьиҥэр «хотугу хаамыы» диэн ааттыыллар эбит. Бу хаамыы Финляндияҕа айыллыбыт. Ааспыт үйэ 30-ус сылларыгар финн хайыһардьыттара сайыҥҥы өттүгэр дьарыктарын бырахпат инниттэн тайахтаах хаамар буолбуттар. Ол кэмтэн тайахтаах хаамыы Европа, онтон да атын континеннар дойдуларыгар тарҕанан барбыт. Билигин киһи-аймах биир саамай сөбүлүүр спордун көрүҥэр кубулуйбут. Россияҕа скандинавскай хаамыы (эбэтэр «хотугу хаамыы») 2010 с. киирбитэ. Оттон Саха сиригэр 2012 с. кэлбитэ уонна республика олохтоохторун маассабай дьарыктарынан буолла. Бу хаамыы хас дэриэбинэ, бөһүөлэк, куорат аайы тарҕанна, муомалар да, саастарыттан тутулуга суох, оҕотуттан кырдьаҕаһыгар тиийэ, дьарыктанар буоллулар. Айталина Егоровна тайахтаах хаамыыны билиһиннэрдэ, доруобуйаҕа, ордук ханнык уорганнарга туһалааҕын сиһилии кэпсээтэ. Көрсөһүүгэ Хонуу эрэ бөһүөлэгин буолбакка Буор Сыһыы олохтоохторо эмиэ кэлбиттэрэ бу скандинавскай хаамыы нэһилиэнньэҕэ күүскэ тарҕаммытын туоһулуур.

Йоганы (сегун) Дмитрий Гороховбилиһиннэрдэ. Бу былыргы Индияҕа айыллыбыт көрүҥ илиини-атаҕы, тоноҕоһу, сүһүөхтэри, эти-сиини, былчыҥы-уҥуоҕу сайыннаран, имигэстик хамсаныыны эрэ буолбакка, бүтүн философияны кытта сибээстээх.

Быйылгы дьылтан урукку сэбиэскэй кэм үтүө үгэһэ ― ГТО нуормаларын туттарыы хат сөргүтүллэн, олоххо киирэн эрэр. Ол чэрчитинэн Александр Брызгалов салалтатынан түөрт киһилээх бөлөх кэлэн оройуон олохтоохторуттан тэрилтэлэринэн ГТО нуорматын туттарыыны билиһиннэрэ сылдьар. Бу күннэргэ полиция, баһаарынай чаас сотрудниктарын, Муома орто уонна начальнай оскуолаларын үөрэнээччилэрин, педколлективтарын кытта көрүстэ.