Улуустааҕы социальнай отдел спорка, физкультураҕа кылаабынай специалиһа Алексей Захаров кэпсиир:

- Дьокуускайга Спорт министерствотыгар киирэн үлэбит сыалын-соругун туһунан билиһиннэрбиппит, инбэлииттэр дьарыктаналларыгар, күрэхтэһиилэри тэрийэргэ бииргэ үлэлэһэр соруктаахпытын эппиппит, Адаптивнай физкультура уонна спорт республикатааҕы киинигэр сылдьан хайдах көрүнэн, дьаһанан олороллорун билсибиппит. Ол сырыыбыт түмүгүнэн биһиэхэ “төгүрүк остуол” тэрилиннэ. Үлэбитин-хамнаспытын миэстэтигэр көрдөрөрбүтүн сэргэ, кыһалҕаларбытын эмиэ эттибит.

Алексей Николаевич иһитиннэрбитинэн, инбэлииттэр спордунан, физкультуранан спортивнай саалаларга дьарыктаналлар. Ол гынан баран, кэлээскэнэн сылдьар, кыайан хаампат, куһаҕаннык көрөр-истэр дьоҥҥо манна сылдьыы кэккэ ыарахаттардаах. Онон инбэлииттэргэ табыгастаах усулуобуйа наадатын, кинилэри кытта үлэлэһэр инструктор штата көрүллэрин туруорустулар. Ол кэннэ салгыы ыалдьыттарга спорт-саалаларын көрдөрдүлэр. Бочче оонньуутугар маастар-кылаас ыытылынна.

Манна даҕатан эттэххэ, кэлээскэнэн сылдьар Семен Семенов инбэлииттэргэ буулдьанан ытыыга күрэхтэһиини тэрийбитин горнайдар киэн тутта кэпсииллэр. Күрэхтэһиигэ Намтан, Дьокуускайтан, Хатастан, Чурапчыттан уопсайа 70-ча спортсмен кыттыбыт. Мантан ыла күрэхтэһии сылын аайы ыытыллыа диэн олохтоохтор үөрэллэр. Улуус дьаһалтатыгар, улуустааҕы инбэлииттэр обществоларыгар, социальнай управлениеҕа күрэхтэһиини тэрийиигэ көмөлөспүттэригэр махтаналлар.