Горнай улууһугар «Бичик» кинигэ кыһатын күннэрэ бэрт тэрээһиннээхтик ыытылыннылар

Кулун тутар 2-3 күннэригэр Горнай улууһугар «Бичик» кинигэ кыһатын күннэрэ бэрт тэрээһиннээхтик ыытылыннылар.


Бастакы күн кыһа редакциятын сэбиэдиссэйэ Надежда Андросова салайар бөлөҕө: суруйааччылар, «Чолбон» сурунаал редактора Иван Осипов-Ойуур, Дьокуускайдааҕы авиапорт пресс-сулууспатын салайааччы Яна Байгожаева — Маҕарас библиотекатыгар ааҕааччылары кытта көрүстүлэр. Манна атах тэпсэн олорон иһирэх кэпсэтии буолла, кинигэ атыыланна, бастыҥ ааҕааччылар «Бичик» анал бэлэхтэрин тутан үөрдүлэр.
Иккис күн «Бичик» кинигэ кыһатын дириэктэрэ Август Егоров, кылаабынай редактор Валерий Луковцев, редакция сэбиэдиссэйэ Надежда Андросова, суруйааччылар Иван Осипов-Ойуур, Галина Нельбисова, Яна Байгожаева, Иван Тарабукин, Василий Гоголев-Уйулҕан Горнай улууһун баһылыга Никита Андреевы кытта көрүстүлэр.
Манна улуус дьаһалтата уонна «Бичик» кинигэ кыһата салгыы бииргэ үлэлэһэргэ кэпсэттилэр. Никита Андреев «Бичик» кыһа уон тыһыынча солкуобайдаах сертификатын атыыласта.
Салгыы улуус дьаһалтатын мунньахтыыр саалатыгар «бичиктэр» ааҕааччылары кытта көрсүһүүлэрэ буолла. Август Егоров, Валерий Луковцев кыһа үлэтин-хамнаһын сырдаттылар, инники былааннарын кытта билиһиннэрдилэр, көрсүһүү кыттыылаахтарын ыйытыыларыгар хоруйдаатылар. «Кинигэ ааҕар киһи киэҥ билиилээх, үлэтигэр ситиһиилээх буолар», - диэн туран бастыҥ ааҕааччыларга сертификаттары, бэлэхтэри туттардылар.
Суруйааччылар Уйбаан Ойуур, Яна Байгожаева, Иван Тарабукин айар үлэлэрин туһунан кэпсээтилэр, саҥа хоһооннорун аахтылар.
Маннык көрсүһүүлэр Бэс Күөлгэ, Кэптиҥҥэ буоллулар. Улуус олохтоохторо «Бичик» кинигэ кыһатын күннэриттэн элбэҕи билбиттэрин, астыммыттарын эттилэр. Инникитин даҕаны ааҕааччылары элбэх кэрэхсэнэр кинигэлэринэн үөрдэллэригэр, суруйааччылары кытта көрсүһүүлэри тэрийэллэригэр баҕардылар.