Хас биирдии үүнэр күҥҥүтүн үөрэ-көтө көрсүҥ, сырдыгынан сыдьаайан, ырааһы ыралаан, саҥа сылга чөл куттаах, бигэ туруктаах, эрэллээх эркиннээх, сылаас холумтаннаах, толору астаах, дьол-соргу аргыстаах үктэниэҕиҥ диэн баҕа санаабытын тиэрдэбит!

Дойду үрдүнэн 2015 – Литература сылынан биллэрилиннэ! Онон, эһиэхэ анаан өссө интэриэһинэй саҥа кинигэлэри бэчээттиэхпит, сонун тэрээһиннэри тэрийиэхпит. Онон, Бичиктиин бииргэ буолуҥ, ааҕар кинигэни аргыс оҥостуҥ!

Урут хас биирдии ыал сарсыарда ойон турда да, истиэнэҕэ ыйанан турар, күннэринэн арыллар халандаар биир лииһин туура тардан ыларга улахан былдьаһык буолара. Ол халандаар биир күнүн кэннигэр араас интэриэһинэй барыта баара. Билигин ол үтүө үгэһи тутуһан, «Бичик» кинигэ кыһата сыл ахсын «Саха ыалын халандаарын» таһаарар. 2015с. көрсө бу халандаар өссө ааспыт күһүн оҥоһуллан, атыыга киирбитэ. Манна туох интэриэһинэй баарый диир буоллахха, хас биирдии күн бэлиэ түгэннэрэ, күн-дьыл хаамыыта, бит-билгэ, сиэр-туом, киһи санаатын көтөҕөр, куту бөҕөргөтөр алгыс үтүө тыллара киирдилэр. Кэрэ аҥаардарга минньигэс ас ырысыаба, тас сэбэрэни көрүнэргэ, доруобуйаны тупсарарга, оҕону иитэргэ араас сүбэ, сынньалаҥҥа туттарга уостан түспэт ырыалар халандаары сэргэхситэн биэрдилэр.

Саҥа сылы көрсө бэрт сотору кэминэн «Бичик» маҕаһыыннарыгар оҕолорго маннык саҥа кинигэлэр кэлэллэрэ күүтүллэр:

Устар ууну сомоҕолуур уус тыллаах олоҥхону оннооҕор улахан да киһи ааҕарыгар бэрт уустук соҕус, ойуулуур-дьүһүннүүр тылын-өһүн баайа, хомуһуна, эгэлгэтэ сөхтөрөр. Онтон оҕоҕо ону аахтарар өссө ордук ыарахан. Ол иһин, оҕолорбут барахсаттарга өйдөнүмтүө буоллун диэн судургу тылынан кылгастык сүрүн өйдөбүллэри быһааран биэрэр «Олоҥхо дойдута» диэн кинигэ таҕыста. Бу кинигэҕэ оҕолор «Дьулуруйар Ньургун Боотур» диэн улуу олоҥхотун кылгас ис хоһоонун кытта билсиэхтэрэ. Биһиги олоҥхобутун үөрэтэр, харыстыыр уонна үйэтитэр соруктаахпыт. Онон, олоҥхо алыптаах аартыга арылыннаҕа буолуохтун!

Умсуура «Чуораанчык уу дойдутугар» диэн улахан кээмэйдээх остуоруйа кинигэтигэр сүрүн герой, тыллаах-өстөөх чобуо уол Чуораанчык мүччүргэннээх сырыылара киирдилэр. Орто саастаах оскуола оҕолоро бу остуоруйаны ааҕа олорон, уу олохтооҕор Маттаҕа, үһү дойдуга, Алып Хара Аан Дарбыайга о.д.а. сылдьыахтара.

Онон, Бичик кинигэлэрин, халандаардарын ааҕыҥ, туһаныҥ, доҕор оҥостуҥ!