Баһылык Никита Андреев, бастатан туран, предпринимателлэр тэрийэр үлэлэригэр кыһамньыларын, туруоруммут сыалларын-соруктарын олоххо киллэрэргэ дьулуһууларын бэлиэтээтэ.

- Форум кыттыылаахтара инвестиционнай бырайыактары көрүү, государство оҥорор өҥөлөрүн, дьон-сэргэ дьарыктаах буолуутун хааччыйыы туһунан боппуруостары ырыттылар. «Быйаҥ» ХЭУо директора Айсен Эверстов сокуоннай саастарын ситэ илик оҕолорго социальнай өйөбүлү оҥорор сыалтан быстах кэмҥэ үлэнэн хааччыйыы, нэһилиэги өрө тардыы, тупсарыы үлэтин тэрийии туһунан сэһэргээтэ. Предпринимателлэр санааларын үллэһиннилэр, ыйытыыларыгар хоруйдары ыллылар.

Тэрээһин чэрчитинэн ыытыллыбыт быыстапка-дьаарбаҥкаҕа нэһилиэктэртэн предпринимательствонан дьарыктанар 40 киһи кытынна. Маннауран тарбахтаахтар кылтан, сиэлтэн оҥоһуктара, минньигэс ас-үөл, үүт, эт ас арааһа тардылынна. Тэрээһиҥҥэ саҥа саҕалаабыт предпринимателлэр эмиэ көхтөөх кыттыыны ыллылар. Ол курдук, ИП Евгений Ефремов пластиктан емкостарын дьон-сэргэ сэргээтэ. Кини дьиэни-уоту толору хааччыллыылаах оҥорорго туһаайан үлэлэһэрэ ордук кэрэхсэннэ. Андрей Михайлов тэрилтэлэртэн туһата суох хаалбыт кумааҕылары хомуйан, салфеткалары, туалетнай кумааҕылары оҥорорго үлэлэһэр. Быыстапкаҕа элбэх үлэ туруорулунна уонна көрөөччүлэргэ ананар үлэ-хамнас толору сырдатылынна, -- диэн үп-экономика управлениетын экономикаҕа отделын начальнига Сахаайа Петрова кэпсээтэ.

Бу эйгэҕэ ылсан дьарыктаныан баҕалаахтар тэрээһиҥҥэ сылдьан бэйэлэригэр элбэҕи биллилэр-көрдүлэр.