СИА-ҕа театртан иһитиннэрбиттэринэн, гастролга эдэр артыыстар Алиса Саввинова, Айсен Аммосов – Айыы Сиэнэ, Артур Семенов – Айгыл, Василена Шарина – Алтаана, Валентина Аммосова, Прокопий Григорьев уонна РФ, СР үтүөлээх артыыһа Афанасий Афанасьев үҥкүүлэринн труппата сырыттылар.

Артыыстар айар концертарын Солоҕон, Дьикиимдэ, Ааһыма, Маҕарас уонна, биллэн турар, Горнай оройуонун киинин – Бэрдьигэстээх олохтоохторугар анаатылар. Хомуска оонньооһун, тойук уонна чабырҕах толоруутун үрдүк маастарыстыбатын көрдөрдүлэр.

Үҥкүүлүүр паара «Бэрт Хара» олонхо-спектаклтан саха өрөгөйүн үҥкүүтүн толордо. Азиатскай-тихоокеанскай регион «Венок дружбы» конкурсун дипломана Валентина Аммосова көрөөччүлэргэ бэйэтин «Таба үҥкүүтэ» уонна «Дэйбиирдээх үҥкүү» диэн конкурска кыттыбыт нүөмэрдэрин бэлэхтээтэ, Афанасий Афанасьев сахалыы темаҕа Анастасия Готовцева «Чараҥ вальса» ырыатыгар классическай вальсы толордо.

Концерды таһынан артыыстар нэһилиэктэр олохтоохторугар саха үҥкүүтүгэр уонна хомуска маастар-кылаастары биэрдилэр, оттон Афанасий Афанасьев тиийиммэт-түгэммэт ыалларга аналлаах аһымал акцияҕа кытынна.

Горнай улууһун олохтоохторо эдэр импровизатор – хомусчуттар толорууларын сөҕө-махтайа иһиттилэр, концерт бүтүүтүгэр атахтарыгар туран эрэ таһыннылао. Концертар ыы-быччары саалаҕа аастылар.