Быыстапканы улуус олохтоохторо, ыалдьыттара бэркэ сэҥээрэн көрдүбүт. Манна араас барыта баар. Холобур, баайыы, тигии таҥас эгэлгэтэ, көмүстэн, араас тимиртэн киэргэллэр, оҕуруонан оһуордар, уруһуй, быысапка. Бэл, дыргыл сыттаах оҕо суунар мыылалара кытта быыстапкаҕа турдулар.

Дьон-сэргэ кэрэхсии көрбүтүн, бэйэтигэр наадалааҕы мантан удамыр сыанаҕа атыыласта. Колледж остолобуойун үлэһиттэрэ ас арааһын астаан аҕалбыттара атыыга хамаҕатык барда.

Быыстапка бүтэһик күнүгэр колледж директора Тамара Казакова тэрилтэтин талааннаах кэрэ аҥардарын эҕэрдэлээн туран, инникитин да ситиһиилээх үлэни баҕарда.

Быыстапка кэмигэр далбар хотуттары чиэстээтилэр, үлэлэрин-хамнастарын билиһиннэрдилэр. Улуус салалтатыттан баһылыгы социальнай боппуруостарга солбуйааччы Зинаида Иванова, улуустааҕы култуура управлениетын начальнига Мария Тараярова эҕэрдэ тылларын тириэртилэр, грамоталары, махтал суруктары, сыаналаах бэлэхтэри туттардылар.