Манна суруйааччылар, айар куттаах дьон уонна литератураны сэҥээрээччилэр муһуннулар. Санааны аһаҕастык үллэстиигэ сүрүннээн суруйааччы туох тиэмэҕэ суруйуохтааҕын, ааҕааччы хайдах кинигэлэргэ наадыйарын, кириитикэ тоҕо суоҕун уо.д.а. боппуруостарга тохтоотулар.

СӨ Суруйааччыларын союһун бэрэссэдээтэлэ Наталья Харлампьева, «Бичик» кинигэ кыһатын дириэктэрэ Август Егоров, Валерий Луковцев, Надежда Андросова тус санааларын үллэһиннилэр.

Валерий Луковцев: «1990-с сылларга биһиги литератураны салҕааччылар баар буолуохтара дуо?» диэн боппуруоһу куруук туруорар этибит. Ол эрэн, Наталья Харлампьева көҕүлээһининэн эдэр суруйааччылар элбээтилэр», – диэн кэпсэтиини саҕалаата. Бүгүҥҥү сэһэргэһии айар үлэҕэ ылсыан баҕалаах эбэтэр номнуо кинигэлэрдээх эдэр ааптарга сүбэлиир-амалыыр, суол тэлэр хайысхалааҕын бэлиэтиэххэ сөп.

«Нуучча дьиҥнээх классическай каноннарыгар олоҕуран суруйар дьон аҕыйыыр. Ырытар кириитикэ суох. Литература сайдыыта кириитикэтэ суох кыаллыбат. Поэзияҕа эдэрдэр атын тыыны киллэрдилэр. Поэзия икки хайысханан барда: ырыа буолар уонна бөлүһүөктүү көрүүлээх хоһооннор. Хорсун кириитик баара буоллар, бу айымньылары сүрдээх интэриэһинэйдик көрүө этэ», – диэн суруйааччы үлэлииригэр, сайдарыгар кириитикэ суоҕа атахтыырын Наталья Харлампьева бэлиэтээтэ.

Прозаиктар Огдо, Ульяна Захарова, Николай Рыкунов, Оксана Гаврильева-Айсаана, Василий Гоголев-Уйулҕан, Иван Тарабукин, Долун, Ангелина Васильева, Айталина Никифорова уо.д.а. бэйэлэрин айар үлэлэрин туһунан кэпсээтилэр. Ону сэргэ литератураны ырытааччылар, наука доктордара Ульяна Винокурова, Прасковья Сивцева уо.д.а. олус туһалаах сүбэлэри-амалары биэрдилэр, бэйэлэрин көрүүлэрин билиһиннэрдилэр.

Истиҥ сэһэргэһии кыттыылаахтара литературнай айымньыларга кириитикэ наада дуу, литературнай ырытыы дуу диэн боппуруоска тохтоон аастылар. Кинигэни эдэр ыччат көрдөөн туран аахпатынан, нуучча, омук классиктарын тылбаастыыр туһалаах буолуоҕун, эдэр суруйааччыларга куонкурустар наадаларын, ол эрээри кыттааччылар саастарын 35-гэр диэри диэн хааччахтаабаттара наадатын уо.д.а. эттилэр.

Август Егоров истиҥ кэпсэтии түмүгэр суруйуон баҕалаах дьон бэйэлэрин истэригэр буһа сылдьыбаттарыгар, ааҕааччылары уонна кинигэ таһаарааччылары кытары ыкса сибээстээхтик үлэлииллэригэр ыҥырда.