Бырааһынньыктыы киэргэтиллибит түһүлгэ кыттыылаахтарынан Дьокуускай куорат, Тулагы, Марха оскуолаларын үөрэнээччилэрэ, учууталлара буоллулар. Оҕолор хомуһу дьүрүһүттүлэр, хомуһуннаах хоһоону доллоһута аахтылар, ыллаан дьиэрэттилэр, үҥкүүлээн тэйдилэр. Сөрүүн сүөгэй курдук сүрэҕи-быары сөрүүкэтэр саха тылын күнүнэн итии-истиҥ эҕэрдэлэр этилиннилэр.

Дьокуускай куорат үөрэҕин управлениетын начальнига Алексей Петров ийэ тылы киэҥник тарҕатарга, кэнчээри ыччат төрөөбүт тылын билэ, таптыы улаатарыгар болҕомто, кыһамньы уурулларын бэлиэтээтэ. 2009 сыллаахха Дьокуускай куоракка саха тылын үөрэтэр тоҕус оскуола баар эбит буоллаҕына, 2014 сыл түмүгүнэн 29 оскуолаҕа саха тылын үөрэтэри ситиспиттэрин иһитиннэрдэ. Төрөөбүт тыл туһугар бары кыһамньыларын ууран үлэлэһэр төрөппүттэргэ уонна учууталларга махтал суруктары туттарда.

-- Төрөөбүт тыл декадатын ыытыы биһиги үтүө үгэспит. Тэрээһин сахалыы тыллаах оскуолалары сүрүннүүр сэбиэт үлэтиттэн саҕаламмыта. “Айыы кыһата” оскуолаҕа ыытыллыбыт семинарга учуталлар төрөөбүт тыл уруогун сэргэхтик ыытыы, оҕо болҕомтотун тардыы туһунан сэһэргэспиттэрэ. 1 №-дээх оскуолаҕа учуутал Анна Попова уонна 17-с оскуола учуутала Мария Попова семинардара буолуоҕа. Итини сэргэ, Дьокуускай куорат бары оскуолаларыгар анаан “Икки тылым -- икки кынатым” диэн тэрээһиҥҥэ оҕо-аймах билиитин-көрүүтүн хаҥатыыга араас хайысхалаах үлэни ыытыы туһунан киэҥ кэпсэтии былааннанар. Оскуолаларга библиотечнай уруоктар, бэсиэдэлэр, кылаас чаастара, биллиилээх дьону кытта көрсүһүүлэр тиһиктээхтик салҕана ыытыллаллар. Тэрээһиммит сыала-соруга үөрэнээччи төрөөбүт тылын сүрэҕэр-быарыгар иҥэринэн, ийэ тылынан киэн тутта улаатарыгар, төрөөбүт Сахатын сирин сайыннарсарыгар ананар, -- диэн кэпсиир Дьокуускай куорат оскуолаларын саха тылыгар учууталларын түмсүүтүн салайар Марианна Борисова.

-- Бу тэрээһин биһиэхэ, үүнэр көлүөнэҕэ, олус наадалаах уонна туһалаах. Манна түмсэн атын оскуолаларга саха тылын уонна литературатын саастыылаахтарбыт хайдах үөрэтэллэрин истэбит, билэбит. Маныаха төрөөбүт тылбытын билэр буоламмыт, санаабытын сайа этэбит, ис дууһаттан астына сэһэргэһэбит. Биһиги тылбыт баай уонна кэскиллээх, -- диир 17-с №-дээх оскуола ХI-с кылааһын үөрэнээччитэ Олег Егоров. Оҕолор ону бигэргэтэн: “Биһиги сахабыт тылынан киэн туттабыт”, -- дэһэллэр.