- Улахан болҕомтону нэһилиэктэрбитигэр уурабыт. Агиткульт десаннар, маастар-кылаастар, бэсиэдэлэр, нэһилиэк дьаһалталарын кытта бииргэ үлэлээһиҥҥэ сөбүлэһиилэр, айар киэһэлэр тиһиктээхтик ыытыллаллар. Быйыл “Саха” НКИК Бэрдьигэстээхтээҕи филиалын кытта отуттуу мүнүүтэлээх үс репортаһы оҥордубут. СР культуратын үтүөлээх үлэһитэ Алексеева Софья Никтична, Бэрдьигэстээхтээҕи кыраайы үөрэтэр музей директора Степанова Елена Григорьевна үлэлэрин-хамнастарын, олохторун-дьаһахтарын, дьиэ кэргэннэрин туһунан уонна “Кэптин” сынньалаҥ киинин үлэтин-хамнаһын көрдөрөр киинэлэр болҕомтону тартылар. Культура сылын түмүктүү тэрийбит баалбытыгар бары нэһилиэктэрбитин түмтүбүт, - диир культура управлениетын начальнига Тамара Кесарева.

Үөрүүлээх күн умнуллубат түгэнинэн “Горнай улууһун культуратын бочуоттаах үлэһитэ” бэлиэни бу эйгэҕэ өр сылларга бэриниилээхтик үлэлээбит ветераннарга туттарыы буолла. Дьоро киэһэни Дьокуускай куораттан ыҥырыллыбыт “Туймаада” ансаамбыл эр дьоно ыллаан киэргэттилэр. Үөрүүлэх тэрээһиҥҥэ улуус нэһилиэктэрин баһылыктара, улуус дьаһалтатын үлэһиттэрэ кытыннылар.