«Нолтэн гарпанналнии», «Поют и танцуют Дети Севера» уонна «Сияй, свети талантами, заполярная земля» улуустааҕы фестиваллар үтүө өйдүбүлү хааллардылар. «Муусука барыбытыгар» бырайыагынан туһааннаах үлэ барда. Бу 2014 сылга ыытыллыбыт тэрээһиннэр сорохторун эрэ ааттаатыбыт.

Дьоро киэһэ үөрүүлээх чааһа культура үлэһиттэрин наҕараадалааһынтан саҕаланна. Үлэ бастыҥнарыгар «Булуҥ улууһа (оройуона)» МО дьаһалтатын, культура управлениетын бочуоттаах грамоталара туттарыллынна.

Улуус баһылыга К.Н.Шахурдин бу күннэргэ Дьокуускайга Галина Николаевна Зотова «Норуот уус-уран айымньытын сайыннарыы иһин» бэлиэнэн наҕараадаламмытын туһунан иһитиннэрдэ. Итини сэргэ биир үөрүүлээх сонунунан Людмила Михайловна Максимова Булуҥ улууһун социальнай, экономическай сайдыытыгар кылаатын уонна культура эйгэтигэр үтүөлэрин иһин «Гражданскай килбиэн» бэлиэнэн бэлиэтэммитэ буолла. Москваҕа Саха Республикатын бастайааннай бэрэстэбиитэлэ Алексей Александрович Стручков Саха сирин норуоттарын культураларын, духуобунастарын сайыннарыыга кылааттарын, Российскай Федерацияҕа Культура сылын чэрчитинэн республикатааҕы бырайыактары олоххо киллэриигэ көхтөөхтүк кыттыбыттарын иһин Махтал суруктара культура улуустааҕы управлениетын начальнигар Т.И. Баясгалангийҥҥа, культурнай, спортивнай комплекс отделын салайааччытыгар В.И.Самойловаҕа туттарылынна. А.Н.Коркиҥҥа, О.П.Рииска «Булуҥ улууһун бочуоттаах гражданнара» бочуоттаах ааттар иҥэрилиннилэр. Надежда Михайловна Баишеваҕа, Ирина Ивановна Васильеваҕа, Ольга Победовна Гороховаҕа уонна Елена Николаевна Гоголеваҕа Культура, духуобунай сайдыы министерствотын «Культура туйгуна» бэлиэлэрэ туттарылынна. Улуус дьаһалтатын, культура управлениетын грамоталарынан культура эйгэтин үлэһиттэрэ бэлиэтэннилэр. Быыкап нэһилиэгин «Сардаана» этнокультура киинэ - «2014 сыл бастыҥ тыа сирин культуратын тэрилтэтэ», Күһүүр библиотеката - «2014 сыл бастыҥ библиотеката», Тиксии улуустааҕы библиотекатын отделын салайааччы Людмила Михайловна Корякина - «2014 сыл бастыҥ библиотекара» буоллулар.

«Маяк Арктики» хаһыат директор-редакторын э.т. А.В.Иванов общественнай уонна эдэр корреспонденнар ортолоругар ыытыллыбыт айар куонкурус түмүктэрин билиһиннэрдэ. Куонкурус кыайыылаахтарынан улахан дьоҥҥо С.Е.Садовникова, Т.К. Слепцова, И. И. Голикова, үөрэнээччилэргэ Александр Ачикасов (Таймылыыр), Екатерина Егорова (Тиксии), Вера Кобякова (Хара Уулаах) буоллулар.

Дьоро киэһэ улуус бастыҥ ырыаһыттара, айар коллективтара кыттыылаах бырааһынньыктааҕы улахан кэнсиэринэн түмүктэннэ.