«Сардаҥа» кинотетрга култуура салаатын бары үлэһиттэрэ, салайааччылара, бэтэрээннэрэ, нэһилиэктэр баһылыктара, нэһилиэнньэ кыттыылаах Култуура сылын түмүктүүр тэрээһин буолан ааста. Тэрээһиҥҥэ «Нам улууһа» МТ баһылыга А.П. Атласов, СР Ил Түмэн депутата А.Р. Винокурова, култуура министрин солбуйааччы Н.А. Макаров, Олоҥхо театрын дириэктэрин солбуйааччы М.В. Турантаева, Емельян Ярославскай аатынан история уонна хотугу норуоттар култуураларын государственнай музейын быыстапкатын саалатын сэбиэдиссэйэ М.В. Стручкова, «Нам улууһа» МТ депутаттарын Сэбиэтин председателэ И.Р. Попов, Нам улууһун баһылыгын социальнай боппуруостарга солбуйааччы В.Н. Дьяконова уонна Нам улууһун култууратын уонна духуобунай сайдыытын управлениетын начальнига Е.А. Заровняева кыттыыны ыллылар.

Култуура сылын түмүктүүргэ ыҥырыылаах ыалдьыттар үрдүк таһаарыылаахтык үлэлээбит, сыраларын ууран туран култуура сайдыытыгар кылааттарын киллэрбит бэтэрээннэргэ, билигин да үлэлии, салайа сылдьар үлэһиттэригэ грамота, махтал сурук туттардылар, түөскэ анньыллар бэлиэлэри, анал ааттары иҥэрдилэр уонна эҕэрдэ тыл эгэлгэтин эттилэр. Ол курдук, улуус баһылыга Александр Атласов СР Ил Дарханын Егор Борисов аатыттан И.Д. Винокуров-Чаҕылҕан аатынан Литературнай музей сэбиэдиссэйигэр У.Д. Сивцеваҕа «За заслуги в области культуры, вклад в социально-экономическое развитие республики и многолетний добросовестный труд» диэн ис хоһоонноох грамотаны, улуус дьаһалтатын аатыттан М.К. Аммосов аатынан СР государственноһын историятын республикатааҕы музей дириэктэригэр А.В. Кириллиҥҥэ «За вклад в развитие муниципального образования «Намский улус»» диэн түөскэ анньыллар бэлиэни туттарда. Култуура министрин солбуйааччы Н.А. Макаров «СР култууратын туйгуна» бэлиэни Слепцов С.С. (Хатыҥ Арыытааҕы музыкальнай оскуола), Куличкина-Шамаева Е.П. (Модут), Ефимова Т.А. (Намнааҕы музей) уонна Уодай Т.Р. (Хамаҕатта) иҥэрдэ. Заровняева Е.А. мустубут дьон дохсун ытыс тыаһын доҕуһуолунан өр сылларга бэрэниилээхтик үлэлээбит бэтэрээннэргэ, билигин да үлэлии сылдьар үлэһиттэргэ, уопсайа 26 киһиэхэ «Нам улууһун култууратын бочуоттаах үлэһитэ» диэн бэлиэни туттартаата. Маны таһынан, култуура эйгэтин үлэһиттэрэ, норуодунай маастардар Ил Түмэнтэн, Култуура министерствотыттан, Өксөкүлээх Өлөксөй аатынан норуоттар доҕордоһууларын дьиэтиттэн бочуотунай грамоталары ыллылар.