Улуус кииниттэн кэлбит ыалдьыттар хас биирдии тустаах салааларынан ааспыт сылга туох үлэни тэрийэн ыыппыттарын билиһиннэрдилэр, олохтоохтору кытта ирэ-хоро сэһэргэстилэр. Бу күн эдэр ыаллар субсидиянан туһаныы, тыа хаһаайыстыбатын управлениетынан көрүллэр субсидиялар, сиргэ-уокка сыһыаннаах боппуруостар, нолуок төлөбүрүн туһунан сэргээн, сэҥээрэн иһиттилэр.

Бэйэ дьыалатын тэриниэн баҕалаахтар дьоҕус бизнеһи хайдах тэрийэри, бизнес-былааны хайдах суруйары токкоолостулар, граннар, дьоҕус кредиттэр, займнары ылыы туһунан ыйыталастылар. Баайаҕа дьоно-сэргэтэ бу көрсүһүүгэ эмиэ кытынна. Кинилэр эдэрдэргэ өйөбүл, көмө наадатын эттилэр. Итини сэргэ, тыа сиригэр аҥардас сүөһүнү, сылгыны иитиинэн муҥурдаммакка, хайысханы элбэтэргэ сыал-сорук туруоран үлэлэһэри, онуоха болҕомто эрэйиллэрин ыйдылар, санааларын үллэһиннилэр. Миэстэтигэр кэлэн сүбэни-аманы оҥорооччулартан бэрт элбэҕи чопчуластылар.

-- Маннык тэрээһин ыытыллара биһиэхэ, тыа сиригэр үлэлии-хамсыы сылдьар дьоҥҥо, олус наада. Элбэҕи билэбит, ыйыталаһабыт. Атыттары истэн холобур ылабыт. Ол барыта бэйэбитигэр көмөлөөх. Ордук үлэтэ суох сылдьар эдэр ыччакка тирэх буоларыгар баҕарабыт, -- диэн предприниматель Екатерина Апросимова санаатын үллэһинннэ.

Екатерина 2006 сылтан мини-бэкээринэлээх уонна кондитерскай, кулинарнайсыахтаах. Төрөппүттэрин дьиэтин өрөмүөннээн, онно кыра тутууну эбэн тигинэччи үлэлээбитинэн барбыт. Биэс үлэһитигэр ыйга 15-тии тыһыынча солкуобай хамнаһы төлүүр. Үлэһиттэрэ уоппускалаахтар, быйылгыттан больничнайынан туһаналлар. Иллээх коллектив асчыттара күннэтэ 150-200 килиэби үтэн таһаараллар, астара атыыга хамаҕатык барар. Ону сэргэ булочка, батон, торт, пирожнай, о.д.а. минньигэһи астыылларын олохтоохтор үөрэн, киэн туттан кэпсииллэр. Катялаах бурдук астарынан улуус киинин эмиэ хааччыйаллар. Билигин предприниматель үлэтин кэҥэтэр, сайыннарар баҕалаах. Ол курдук, биир улахан баҕа санаатынан Ытык Күөлгэ кондитерскай, кулинарнай сыаҕы арыйыы буолар.

Предпринимательство киинин салайааччытаМарианна Мосоркина уонна бөлөх кыттыылаахтара бу күн Екатерина Апросимова үлэтин-хамнаһын көрдүлэр-иһиттилэр, маны сэргэ олохтоох ырыынакка сылдьан дьону-сэргэни кытта сэһэргэстилэр, туох ыарахаттар баалларын ыйыталастылар. “Мандар Уус кыһатыгар” оҕолор, ыччаттар уһаналларын көрдүлэр, Борис Неустроев—Мандар Уустуун дуоһуйа сэһэргэстилэр.