Тохсунньу 13 күнүгэр куорат олохтоохторо уонна ыалдьыттара «Бары бииргэ» тюрк-шоу диэн сонун бырайыакка муһуннулар. Саха эстрадатын артыыстара түүр норуоттара кыттыылаах фестивалларга, концертарга ситиһиилээхтик кыттан кэлэллэрин истэбит. Онно түүр норуоттара Саха сирин артыыстарын экзотика эрэ курдук ылыммакка, чахчы саха норуотун культуратыгар сүгүрүйэллэрин, өссө үчүгэйдик билиэхтэрин, үөрүйэхтэрин атастаһыахтарын баҕаралларын туоһута буолла – бүгүҥҥү түмсүү.

Саха сирин виртуоз хомусчута Дьүрүйээнэ уонна Ырыа Саарын толкуйдаан олоххо киллэрбит бырайыактарын сүрүн ыалдьыттарынан Кыргызстан үтүөлээх артыыһа Бек Борбиев уонна уонна Казахстан тахсан эрэр ырыаһыта Кентал буоллулар. Кинилэр Сиэн Тиитэп, Ый Кыыһа, Өркөн, Күннэй, Сахаайа, Дьүрүйээнэ, Саарын толорууларын кытары билистилэр.

Ыалдьыттарбыт икки чаастаах концерка элбэх иэйиилээх ырыаны толордулар. Вокал куоластаах Бек Борбиевкиэҥ истиэби санатар холку, намыын ырыалары дьиэрэһиппит буоллаҕына, Кентал эдэрдии эрчиминэн «былааһы ылла». Ырыаларын «Сэргэлээх уоттара» Культура киинин сценатыгар эргиччи сүүрэ сылдьан толорон уонна көрдөөх көрүдьүөстэринэн, хайа баҕарар жанрга ылсар кыахтааҕын көрдөрөн, көрөөччүлэри астыннарда. Күннэйи кытары һээдьэлээн, оһуохайдаан, түүр омуктар биир хааннаахпытын, маарыннаһар культуралаахпытын өссө төгүл итэҕэттэ.

Эрдэ биллэриллибитин курдук, бу күн соһуччу дуэттар толоруллуохтаахтара. Ол курдук, Бек Борбиев Сиин Тиитэби, Кентал Өркөнү, Күннэйи кытары дуэттара истиҥник иһилиннэ. Кентал Өркөннүүн куоластара маарыннаһар буолан, ырыалара ордук табылынна.

Сунтаар Элгээйититтэн төрүттээх эдьийдии-балыстыы Дьүрүйээнэ уонна Анжелика бу күн талааннара киэҥник арылынна. Ураты суоллаах-иистээх, элбэҕи эрэннэрэр модьелер Анжелика толкуйдаабыт көстүүмнэринэн түүр норуоттарын ханнык баҕарар муода фестивалларыгар кыттар кыахтааҕын бигэргэттэ. Дьүрүйээнэ түүр норуоттара музыка нөҥүө бэйэ-бэйэлэригэр өссө чугаһасаһалларыгар, атын норуоттар культураларын өйдүү уонна сыаналыы үөрэнэллэригэр баҕаран туран, олоххо киллэрбит бырайыага табылынна.

Туох да диэбит иһин, бастакы аата бастакы. Тюрк-шоу киэҥник рекламаламмакка дуу, концерт буолар күнэ көһөрүллэн дуу саала көрөөччүлэринэн кыайан туолбатаҕын ыалдьыттарбыт хайдах ылыммыттара буолла? Манна даҕатан эттэххэ, түүр-шоуга кытта кэлбит артыыстар биир дойдулаахтара саалаҕа элбэхтэрэ харахха быраҕылынна. Кинилэр төрөөбүт тылларынан толоруллубут ырыалартан дуоһуйбуттара ытыстарын тыаһын харыстаабатахтарыттан уонна саала иһиттэн харах уулаах тахсыбыттарыттан көһүннэ. Көрөөччүлэр инникитин тюрк-шоу кыттааччылара өссө элбиэхтэригэр, географията кэҥиэҕэр баҕара итиэннэ бырайыак ааптардарыгар махтана хааллыбыт.