Тэрээһини саха тылын учуутала Марина Дмитриевна Очирова уонна төрүт култуура учуутала Туйаара Михайловна Никулина иилээтилэр-саҕалаатылар. Дьүүллүүр сүбэҕэ оҕолор олордубут – VII кылаастан Жиркова Валерия, VIII кылаастан Слепцов Антон, IX кылаастан Лебедев Егор, X кылаастан Бурцев Слава уонна XI кылаастан Слепцов Егор.

Бу күн нууччалыы, сахалыы, эбээннии элбэх хоһоон ааҕылынна, ырыа ылланна. Лермонтов, Пушкин, Есенин, Семен Данилов, Иван Гоголев, Петр Тобуруокап, Евдокия Бокова, Петр Колесов, Дмитрий Кривошапкин, Күннүк Урастыырап айымньыларын иһиттибит, көрдүбүт. Семен Данилов куһаҕан үөрэнээччитин оруолун Александр Алемпиевич толордо, Пушкин “Я помню чудное мгновение” хоһоонун Юлия Дмитриевна Луговкина олус бэркэ аахта.

Бу барыта тута, ол аата экспромунан оҥоһуллар диэн балаһыанньалаах, онон ким төһө булугас өйдөөҕө көстөр эбит. Түмүккэ көрөөччүлэр өйдүүр хоһооннорбутун сыанаҕа ааҕан сөбүлээбит хамаандаларбытыгар биирдии баалы эптибит.

Учууталларбытыгар оскуола оҕолорун аатыттан улахан махталбытын аныыбыт уонна маннык тэрээһин сыл аайы ыытыллыаҕын баҕарабыт.

Слава Бурцев. Майыар орто оскуолата