Кириэс Халдьаайы оскуолатыгар «Лингва» диэн английскай тыл фестивала буолла

Билигин омук тылын үчүгэйдик билии - олох ирдэбилэ. Томпоҕо оскуолаларга английскай тылы үөрэтэллэр. Кириэс Халдьаайы орто оскуолатын английскай тылын учуутала Аграфена Мегинова "Алдан-Ситим" диэн сахалыы оскуолалар омук тылын учууталларын үлэтин туһунан маннык кэпсээтэ:


- Күһүн мунньахтаан үлэ былаанын ылыммыппыт. Ол чэрчитинэн, Кириэс Халдьаайы орто оскуолатыгар тохсунньуга "Приемы активизации коммуникативной компетенции учащихся на уроках английского языка" диэн тиэмэҕэ семинар буолла. Онно түөрт аһаҕас уруогу сылдьыбыппыт, ол курдук мин 10 "а" кылаас үөрэнээччилэригэр "Влияние телевидения" диэн уруогу ыыппытым. Мэҥэ Алдантан сылдьар, былырыын ыытыллыбыт эдэр учууталлар куонкурустарын кыайыылааҕа А. Аммосова 7 кылаас үөрэнээччилэригэр сүрдээх интэриэһинэй, түргэн хаамыылаах, хас да тһөһмэхтээх уруогу көрдөрөн үөрэнээччилэр, учууталлар биһирэбиллэрин ылла. Арыы Толооҥҥо бастакы сылын үлэлиир Жанна Бугдасова 6-с кылаастарга "Орто дойду" паарка туһунан уруогун оҕолор сэҥээрдилэр. Үөгэн оскуолатыгар омук тылын учуутала Святослав Слепцов 8-с кылаастарга "Еда" диэн бэрт интэриэһинэй формалаах уруогу ыытта. Кини 13-с сылын учууталлыыр. Биллэн туран, хас биирдии учуутал тус-туспа үлэлиир ньымалаах, онон уруоктартан элбэххэ үөрэннибит, уопут атастастыбыт. Уопуттаах педагог Елена Харитонова маастар кылааһыгар сырыттыбыт. Учуутал оҕолорун биир кэлим экзамеҥҥа хайдах бэлэмниирин туһунан бэйэтин уопутун сырдатта. Семинар түмүгүнэн Томпотооҕу үөрэх управлениетыттан маастаркылааһы ыытыы иһин, аһаҕас уруоктары ыыппыт бары учууталлар сертификат туттубут. Тэрээһиммитигэр сүбэ-ама буолбутун иһин үөрэх чааһыгар дириэктэри солбуйааччы Раиса Омукчановаҕа махтал тылларын тиэрдэбит».
Бастакы семинар уопсай тэрээһинэ, аһаҕас уруоктара үрдүктүк сыаналаннылар, онон семинар сыалын-соругун толору сиппитинэн ааҕылынна.
Маны таһынан быйыл оскуола учууталлара икки саҥа бырайыагынан үлэлииллэр. Ол курдук, "Көрдөөх омук тыла" диэн детсад оҕолоругар куруһуогу Аграфена Мегинова, учууталларга "Английский для загранпоездки" диэн куурсу Елена Харитонова ыыталлар.
Олунньу 18 күнүгэр манна «Лингва» диэн английскай тыл фестивала буолла. Онно Мэҥэ Алдан оскуолатыттан Саша Захаров «Культура и традиция англоязычных стран» диэн тиэмэҕэ дакылаатынан бастаата. Инсценировкаҕа Кириэс Халдьаайы үөрэнээччилэрэ кыайдылар. Эмиэ бу оскуолаттан «GSP» бөлөх үҥкүү куонкурсугар, Саина Харитонова хоһоон ааҕыытыгар, Оксана Никифорова, Эльвира Максимоваырыаҕа бастаатылар.