Уус-Алдаҥҥа «Төрүт тыл түһүлгэтэ» көрсүһүү буолла

Бэс ыйын 6-7 күннэригэр Литература сылын чэрчитинэн Уус-Алдан улууһугар Кулантай аатынан музейга «Төрүт тыл түһүлгэтэ» уран тыл абылаҥар ылларбыт айар куттаах дьоннуун көрсүһүү бэрт тэрээһиннээхтик ааста.


Саха народнай поэта Иван Мигалкин салалтатынан Дьокуускайтан ХИФУ преподавателлэрэ профессор Варвара Окорокова, Мотрена Попова, «Чолбон» сурунаалтан Данил Макеев, Уйбаан Ойуур, «Үйэ» сурунаалтан Николай Кривошапкин, Суорун Омоллоон аатынан Опера уонна балет театрын солиһа Зинаида Колодезникова, Культура министерствотын специалиһа Айал Сильверсан уонна Уус-Алдантан төрүттээх суруйааччылар Сиэн Кынат, Сэки, Даана Сард, Яна Байгожаева, Мария Алексеева-Решетникова тиийэн кыттыыны ыллылар, олохтоохтору улаханнык сэргэхситтилэр.
Улуус айар куттаахтарын кытта көрсүһүү истиҥ быһыыга-майгыга ааста. Олохтоох ааптардар сүрдэрэ көтөҕүллэн туран бэйэлэрин айымньыларын аахтылар, айымньыларын быыстапкатын көрдөрдүлэр. Ыалдьыт суруйааччылар айар үлэлэрин туһунан кылгастык билиһиннэрдилэр, эдэр ааптардарга сүбэ-ама биэрдилэр. Иван Мигалкин суруйар үлэ диэн уустук идэ буоларын ыйан туран, саха литературата сайдарын туһугар дьаныһан дьарыктаныы ирдэнэрин эттэ.

Киэһэ улуус салалтата суруйааччылары кэрэ айылҕалаах Өнөр эбэҕэ баар спортивнай базаҕа илдьэн сынньатта. Онно түүн хойукка диэри литература тула сэлэһии буолла, хоһоон ааҕылынна, ырыа ылланна.
Иккис күн 1936 сыллаахха күһүҥҥү ыһыахха П.А. Ойуунускай тахса сылдьан тыл эппит сиригэр баар пааматынньыкка үөрүүлээх түһүлгэни улуус баһылыгын солбуйааччы Михаил Борисов аста. Улахан суруйааччы, политическай деятель аата үйэлэргэ умнуллуо суоҕар эрэнэрин эттэ.

«Уус-уран суруйуу билиҥҥи кэмҥэ» конференцияҕа филологическай наука доктора Варвара Окорокова сүрүннээн Уус-Алдантан төрүттээх эдэр суруйааччылар дьон болҕомтотун тардар айымньылары айалларын бэлиэтээтэ. Данил Макеевы, Даана Сарды уонна поэт Өнөр Өндөрөйү сүрдээҕин сэргээн ааҕарын эттэ. ХИФУ преподавателэ Мотрена Попова, «Уолан» гимнация учуутала Наталья Бурцева, улуустааҕы библиотека үлэһитэ Туйаара Павлова эдэр суруйааччыларга уобарастаан этии кыалла илигин, классик суруйааччылартан элбэххэ үөрэнэр наадатын ыйдылар. Ол туһуттан араас куонкурустары тэрийии, тиэмэнэн литературнай биэчэрдэри ыытыы наадатын эттилэр.

Бу тэрээһиҥҥэ улуус баһылыга Алексей Федотов кытынна. Улуус айар дьонугар болҕомто ууруллуо диэн эрэннэрдэ. Уус-Алдан улууһун дьаһалтата уонна «Чолбон» сурунаал редакцията бииргэ үлэлэһэргэ сөбүлэһии түһэристилэр.