«Дьиэ төһө хааччыллыылааҕыттан көрөн сыана үрдүүр. Атыннык эттээххэ, дьиэҕэ төһө өҥө оҥоһулларыттан сыана быһаччы тутулуктаах. Төлөбүр 5,3%-тан 10,2% диэри эбиллэр», - диэтилэр сыана политикатын государственнай кэмитиэтигэр.

Эмиэ биэдэмистибэҕэ эппиттэринэн, РФ правительствотын дьаһалынан Саха сирин олохтоохторугар сыана үрдээһинэ 2014 сыл от ыйын 1 күнүттэн ыла 10,2% аһара барыа суохтаах.

Оннук, тымныы уонна сылаас ууларынан, ититиинэн хааччыйыы 6%, газ иһин төлөбүр 4,2%, чоххо, маска сыана 10,5% улаатар.

Электроэнергия иһин төлөбүр от ыйын 1 күнүттэн ыла 4,2% улаатар. Тыа сирин олохтоохторугар -  11,1%. Үс киһиттэн турар толору хааччыллыылаах, гаастаах дьиэ төлөбүрэ ыйга 40-45 солк. эбиллэр. Онтон тыа сиригэр ыйга 70-77 солк. 

«Элбэх сыл устата тыа дьоно электроэнергияҕа чэпчэтиинэн туһаналлара. Инньэ гынан куорат дьонунааҕар 40% чэпчэки сыананан төлүүллэрэ. Суокуон быһыытынан ити араастаһыы 30% буолуохтаах. 2014 сыл от ыйын 1 күнүттэн ыла ити ирдэбил олоххо туһаныллар. Тарыып үрдээһинигэр араастаһыы аны суох буолуо. Нэһилиэнньэ бары араҥата биир тэҥник төлүөҕэ», - диэтилэр сыана политикатын кэмитиэтин специалистара.

Куоракка 63 кв. м иэннээх толору хааччыллыылаах дьиэҕэ олорор, үс киһилиээх дьиэ кэргэн төлөбүрэ ыйга 351 солк. улаатар. Оттон тыа сиригэр олорор дьоҥҥо ыйга 388 солк. Ситэритэ суох хааччыллыылаах, 48 кв. м иэннээх дьиэҕэ олорооччулар гиэнэ ыйга 173 солк. үрдүүр. Гаастаах 90 кв. м. иэннээх дьиэ гиэнэ 195 солк. эбиллэр.

Төһө да сыана үрдэ суох үрдээбитин иһин, Уһук Илин регионнарыгар Саха сиригэр саамай намыһах сыана диэн буолар. Холобур, үс киһилээх дьиэ кэргэн толору хааччыллыылаах дьиэтин иһин ыйга муҥутаабыта 8704 солк. төлүүр эбит буоллаҕына, Хабаровскай кыраайга - 9624 солк., Приморьеҕа – 8636, Камчаткаҕа – 15697 солк.