«Тарифтары уларытыыга быһаарыылар 2015 сыл от ыйын 1 күнүттэн эрэ күүстэригэр киириэхтэрэ. Онуоха диэри сыана оннунан хаалыаҕа», - диэн Госкомцен-РЭК-тэн Антонина Винокурова чопчулаан эттэ. Бүгүҥҥү күҥҥэ Саха сиригэр коммунальнай өҥө иһин төлөбүр Уһук Илиҥҥи региоҥҥа биир саамай намыһахтара.

Республика правительствотын председателин солбуйааччы Павел Маринычев: «Биһиги тарифтары үрдэтиигэ туһанааччы кыаҕын куруутун учуоттуубут. Нэһилиэнньэ ороскуотун кыччатар инниттэн правительство коммунальнай предприятиелар, тэрилтэлэр ороскуоттарын үс гыммыт иккитигэр субсидия көрөр», - диэтэ.

Кини эппитинэн, тариф политикатын инникитин даҕаны сүрүннүүр инниттэн маннык съезтэр ыытыллаллар.

Саха сирин сыананы сүрүннүүр специалистарын съезтэрэ ахсынньы 16-18 күннэригэр буолар. Үс күн устата кинилэр республикатааҕы, олохтоох салайыныы таһымыгар сыананы, тарифтары государство сүрүннээһинин боппуруостарын дьүүллэһиэхтэрэ.

Виктор Эверстов хаартыскаҕа түһэриилэрэ