«Күнчээн» диэн альбом-кинигэ хайа баҕарар оскуолаҕа киириэн иннинээҕи саастаах оҕоҕо күндү бэлэҕинэн буолуоҕа. Манна дьиэ кэргэн хаартыскатын сыһыаран, илиинэн араас оҥоһук оҥоро үөрэниэххит, айымньыны ааҕан, кэпсииргэ дьарыктаан, сахалыы ыйдар ис хоһооннорун билиэххит, ону таһынан, араас сорудаҕы толорон, оҕону сурукка эрчийиэххит!

3-4 саастаах кырачааннар «Биһиги тиэргэммит» диэн кинигэ чаҕылхай ойуутугар тиэргэн иһинээҕи дьиэ кыылларын сыһыаран, ынах, сылгы, куурусса, ыт саҥатын истэн, кыыллар араастарын араара үөрэниэхтэрэ. Оттон «Ырыых-ыраах джунглига» диэн кинигэ ойуутугар сылаас тропическай дойду кыылларын сыһыаран, попугайы, эбисийээнэни, крокодилы, эриэн үөнү саҥардан үөрүөхтэрэ-көтүөхтэрэ.

«Алыптаах Азбука» бу улахан кээмэйдээх дьикти кинигэни арыйдахха, иһигэр магниттаах дуоска баар, маны тэнитэн, оҕо буукубалары, сыыппаралары, остуоруйа дьоруойдарын сыһыаран, ааҕарга-суоттуурга үөрэниэ, кэпсиир, толкуйдуур дьоҕурун сайыннарыа. Магниттаах буукуба көмөтүнэн оҕо саха алпаабытын, дифтоннары үөрэтэн, тылы таба суруйа үөрэниэ, уһуйааҥҥа киирэргэ бэлэмнээх буолуо.

Ааҕыы кэнниттэн сынньана таарыйа Сахабыт сирин кэрэ айылҕатын, дьоллоох Дьокуускай куораты, остуоруйалары арыйар сувенир кубиктары хомуйуҥ. Бу кубиктары эргитэ олорон, киин куораппыт көрүөхтэн кэрэ көстүүлэрин, оҕолорго остуоруйа дьоруойдарын таһаарыаххыт, харалдьыкка саҥа тыллыбыт ньургуһуннары, күөх окко тырымныыр сардаана сибэккилэри көрүөххүт, самаан сайыны саныаххыт. Кубиктары хомуйуҥ, кэрэни кэрэхсээҥ, дьоҥҥутугар бэлэх оҥоруҥ!

«Саха театрын антологията» халыҥ библиографическай альбом 1906 с. сыанаҕа бастакы испэктээкил туруоҕуттан 2010 с. диэри Саха театра үүнэн-сайдан кэлбит историятын кэрдиис кэмнэрин ырылхайдык сырдатар. Көрөөччү болҕомтотугар тахсыбыт испэктээкиллэр, айар үлэ абылаҥар олохторун анаабыт драматург, режиссер, артыыс идэлээх дьоммут сүрүн ситиһиилэрэ барыта манна тиһилиннэ. Бу кинигэ 2011 с. Бэчээт уонна маассабай коммуникация федеральнай агентствота тэрийэн ыытар «Сыл кинигэтэ» национальнай күрэх «HUMANITAS» түһүмэҕэр кыайбыта күүрээннээх үлэ түмүгүн кэрэһилиир.

Сарсын туох буоларын, харчы хайдах уларыйарын тымтыктанан көрбүт суох. Онон, бүгүҥҥү күнү туһанан, чэпчэтиллибит сыананан саха сайдам кинигэтин атыылаһарга тиэтэйиҥ!