Ити туһунан бу күннэргэ Быыбар киин хамыыһыйата бухгалтердарга ыыппыт семинарыгар иһитиннэрдэ. Ону сэргэ быйыл быыбары ыытар хамыыһыйата чилиэннэригэр икки бүк үлэ сүктэриллэрин, хамнастара 13 % үрдээбитин бэлиэтээн эттилэр. Семинар кэмигэр улуустартан кэлбит бухгалтердар быстах кэмҥэ үлэлиир дьоҥҥо хамнаһы, командировкаҕа бэриллэр харчыны хайдах тыырары, смета оҥоруутун ыйыталастылар.
Быйылгы быыбарга өрөспүүбүлүкэ улахан куораттарыгар Дьокуускайга, Мирнэйгэ, Ленскэйгэ, Нерюнгрига, Алдаҥҥа видеонан кэтээн көрүүнү туруорууга 24 мөл. солк. көрүлүннэ. Бэлиэтээн эттэххэ, быыбарга туһаныллар үбүлээһин барыта государственнай уонна муниципальнай сакаастары оҥорууга туһуламмыт 44-с №-дээх федеральнай сокуонунан салаллан куонкурус нөҥүө барыаҕа.       
Маны таһынан бу нэдиэлэҕэ быыбардыыр киин хамыыһыйа суруналыыстары уонна улууска быыбары ыытар хамыыһыйа бэрэстэбиитэллэрин кытта көрүстэ. Семинардарга сокуоҥҥа туох уларыйыы киирбитэ ырытылынна. Ол курдук, быйылгы быыбар биир уратытынан быыбардыыр хамыыһыйалар уонча хонук иннинэ арылланнар эрдэ куоластааһыны саҕалыахтара. Бэлиэтээн этиим, открепительнай удостоверение оннугар быйылгыттан эрдэ куоластааһын барыаҕа. Онон балаҕан ыйын 14 күнүгэр быыбарга кыайан кэлбэт дьон хамыыһыйаҕа эрдэ тиийэн куоластарын биэрэ туруохтарын сөп.