Балаҕан ыйын 25 күнүгэр, форум бастакы күнүгэр, предпринимателлэр “Бизнес экономиката”, “Үбүлээһин боппуруоһа”, “Инфраструктура: саҥа сүүрээн”, “Быраап”, “Билии” диэн секцияларга “төгүрүк остуолларга кыттыахтара. Ону тэҥэ сонун инвестиционнай бырайыактар сүрэхтэниэхтэрэ, дьыалабыай бииргэ үлэлээһин биржата, “Бизнес-Экспо – 2014” уонна “Гозсакаас -- 2014” быыстапка-форум үлэлиэхтэрэ. Ол курдук, “Бизнес экономиката” секцияҕа государство уонна бизнес икки ардыгар көстөр ыарахаттары хайдах быһаарыы, нолуок боппуруостарын ырытыы, инвестиция бырайыактарын тула кэпсэтии буолуоҕа.

“Билии” салааҕа предпринимателлэр сүрүннээн тугу билиэхтээхтэрин быһаарар “Аныгы предприниматель бартыбыала” диэн консультация ыытыллыаҕа.

Форум иккис күнүгэр “Бизнес-Экспо – 2014” уонна “Гозсакаас -- 2014” быыстапка-форум өрөспүүбүлүкэ предпинимателлэрин түмүөҕэ.

Дьиэ кэргэн бизнеһин тэрийиигэ дьахтар оруолун, кини тус көрүүтүн туһунан анал “төгүрүк остуол”, эргиэни сатабыллаахтык тэрийии туһунан дьүүллэһии-мөккүөр трибуната, санаа ситимин ситиһиитин туһунан “бизнес-сессия” диэн саҥа көрүҥ тэрээһин форум кыттыылаахтарын болҕомтотун тардыаҕа.

“Быраап” секцияҕа предпринимателлэри өйүүр омбудсмен кыттыыны ылыаҕа. СӨ Тыа хаһаайыстыбатын министиэристибэтигэр ас-үөл саҥа политикатын, СӨ Сибээс министиэристибэтин конференц-саалатыгар Интернет эйгэтин хайдах баһылыахха сөбүн, СӨ Ыччат министиэристибэтин “Лидер” ыччаты көҕүлүүр киинигэр ыччаты предпринимательствоҕа угуйуу туһунан, маны тэҥэ доруобуйа харыстабылыгар, социальнай өҥөлөрү оҥорууга, ОДьКХ салаатыгар дьоҕус бизнеһи сайыннарыы уо.д. а. салааларынан кэккэ министиэристибэлэргэ “төгүрүк остуоллар” буолуохтара.