Саха сирин баһылыгын уонна бырабыыталыстыбатын дьаһалтатын салайааччы Юрий Куприянов эппитинэн, Алексей Дьячковскай үөрэх, доруобуйа харыстабылын, культура, духуобунай сайдыы, ыччат, дьиэ кэргэн политикаларын, үлэ, социальнай сайдыы министиэристибэлэрин уонна Дьокуускай куорат дьарыктаах буолуутун киинин, архыып дьыалаларын сүрүннүөҕэ. «Ону таһынан Алексей Дьячковский инники кирбиигэ тутуллар национальнай бырайыактар олоххо киириилэрин хонтуруоллуоҕа», - диэтэ Юрий Куприянов.

Алексей Дьячковскай инники үлэтигэр тутуһар сүрүн сыалын-соругун туһунан эттэ. Элбэхтэн аҕыйаҕы холобур быһыытынан эттэххэ, үөскэтиллибит уонна бигэтийбит систиэмэҕэ мэһэйи үөскэппэт соруктаах үлэлиэҕин, үлэҕэ, социальнай сайдыыга ураты болҕомто ууруоҕун, доруобуйа харыстабылыгар сыһыаннаан поликлиникаларга уочарат аччыырыгар, медицинскэй өҥө хаачыстыбата үрдүүрүгэр үлэлэһиэҕин бэлиэтээтэ.

Үлэ ресурсатын промышленность, сир баайын хостооһуҥҥа салайыаҕын ойуччу тутта.

Александр Соловьёв аһаҕас бырабыыталыстыбаны, олохтоох салайыыны, гражданскай уопсастыбаны сайыннарыыга, Саха сирин хоту өттүгэр олорор аҕыйах ахсааннаах омуктары өйөөһүҥҥэ, бэчээт, сибээс, демографическай политиканы, о.д.а. сүрүннүөҕэ.

Ырытыһыы кэнниттэн сис кэмитиэттэр чилиэннэрэ Егор Борисов киллэрбиткандидатураларын өйөөтүлэр. Алексей Дьячковскайы уонна Александр Соловьеву депутааттар алтынньы 9 күнүгэр буолар пленарнай мунньахтарыгар бигэргэтиэхтэрэ.