«Сүрүнэ биһиги хомуйбут харчыбыт буолбатах, ол олимпийскай сүрүн санаа – манна кыттыы буолар», - диэн тылларынан түмүгү таһаарыыны аста правительство бэрэссээдэтэлин солбуйааччы Александр Борисов. Марафоны ыытыы кыттыылаахтарын тиһэх мунньахтарыгар, бүгүн, сэтинньи 12 күнүгэр, сибээс, федеративнай сыһыаннаһыыларга уонна тас сибээстэргэ министерстволар, НКИК, Общественнай палаата, «Барҕарыы» Национальнай фонда, «Алмазэргиэнбаан», Билайн, МТС, Мегафон сотовай сибээс оператордарын бэрэстэбиитэллэрэ сырыттылар.

Саха сиригэр ыам ыйыттан атырдьах ыйыгар диэри үс халаан буолбута. Айылҕа алдьархайын түмүгэр 64 нэһилиэнньэлээх пуун ууга барбыттара, 6 тыһыынча курдук киһи эмсэҕэлээбитэ. Бу акцияны республика Общественнай палаатата көҕүлээбитэ. «Саха» НКИК аһаҕас эфиригэр марафон 12.00 ч 20.00 ч. диэри ыытыллыбыта. «Эфир төһө да өр кэм устата бардар, биһиги студияҕа кыттыан баҕалаахтары барыларын сатаан киллэрэр кыахпыт суоҕа. 300 кэриҥэ киһи тыл эппитэ. - диэтэ «Саха» НКИК I вице-президенэ Нина Харитонова. - Аан бастаан биһиги 3 павильону тэҥҥэ туһаммыппыт. Марафоҥҥа филиаллары кытта барыта 70 киһи үлэлээтэ». Эфир кэмигэр тута уу харчынан 392 690 солкуобай киирбитэ.

Итини таһынан Мегафон, Билайн, МТС уонна стационарнай телефон нөҥүө Ростелеком иһинэн смс-биллэриинэн харчы ыытыахха сөбө.

Александр Борисов республика сибээһин Министерствотыгар смс-биллэриинэн үбү хомуйуу хаамыытын оҥорон биэрэргэ дьаһайда уонна хас сыл аайы сэтинньи 4 күнүгэр итинник акциялары ыытарга этии киллэрдэ. «Мин хас сыл аайы халаан буолуо диэбэппин. Ол эрээри атын да элбэх үтүө дьыала, көмөҕө наадыйааччылар бааллар», диэтэ зампред баар дьоҥҥо туһаайан. Телерадиомарафон сомоҕолоһуу күнүгэр, сэтинньи 4-гэр ыытылларын бары табыгастааҕынан билиннилэр.

Акцияҕа олус элбэх киһи кытынна, олор истэригэр биирдиилээн дьон элбэх үбү сиэртибэлээтилэр. Ол Людмила Егоровна Старостина (12500 солк), Дария Семеновна Павлова (40000 солк).

Саас саҕаланыаҕыттан халаантан эмсэҕэлээбиттэргэ көмөнү хомуйуу биллэриллибитэ. Счеккабэйэлэрин хамнастарын президент Егор Борисов, правительство бэрэссэдээтэлэ Галина Данчикова уонна да атыттар укпуттара. Барыта 14 мөл. 739 тыһ солкуобай киирбитэ. Үп барыта муниципальнай тэриллиилэргэ ыытыллыбыта.