Бүгүҥҥү күҥҥэ Дьокуускай куорат тустаах сулууспатыгар уот иһин иэстээхтэргэ 494 дьыала киирэн сытар. Уопсай суумата 17,2 мөл. солк.

«Энергетиктэр уонна суут приставтар иэһи төлөтүүгэ бииргэ үлэлээбиттэрэ ыраатта, – диэн Энергосбыт Дьокуускайдааҕы салаатын кылаабынай исписэлииһэ Николай Бочков кэпсиир. – Дьокуускай куоракка анал рейдэ тэрийэн 22 иэстээх киһиэхэ сырыттыбыт. Кинилэр уопсай иэстэрэ 1,4 мөл. солк. тэҥнэһэр. Иэстэрин хайаан да төлүөхтээхтэрин туһунан суут быһаарыыта баарын, ону баардыылаабат түбэлтэлэригэр сокуонунан сыаналаах малларын, бааҥҥа баар харчыларын, хамнастарыттан уонна биэнсийэлэриттэн тутар кыахтаахпытын, иэстээх дьон дойду тас өттүгэр күүлэйдии тахсаллара бобулларын туһунан иһитиннэрэбит».

Санатар буоллахха, быйыл кулун тутар 1 күнүттэн «Кирэдьиит историятын туһунан» федеральнай сокуоҥҥа уларыйыы киирдэ. Ол курдук, суут приставын быһаарыытын уон күн иһигэр толорботоххо (коммунальнай хаһаайыстыба салаатыгар), баан кирэдьиитин историятыгар коммунальнай өҥөҕө иэстээҕин иһин хара испииһэккэ киллэриллэр. Онон коммунальнай хаһаайыстыба өҥөтүн кэмигэр төлүүргүтүгэр сүбэлиибит.