2011 сыллаахха “Маай” Маҕараска 74 мөл.солк. суумалаах хотон тутан саҕалаабыта, лизинг көрүҥүнэн тиэхиникэ иэс ылбыта. Ол туһуттан “Россельхозбаантан” улахан суумалаах кирэдьиит ылбыта. Саҥа хотон быйыл тутуллан бүтүөхтээх. “Маай” бэйэтэ 200 төбө сүөһүлээх, ол иһигэр 112 ыанар ынахтаах. Кооперативка 92 үлэһиттээх, кинилэр ааспыт сыллааҕы хамнастарын толору ылан олороллор.

Тыа хаһаайыстыбатын министиэристибэтэ кинилэргэ хаста да көмө оҥорон турар: 2013-14 сс.—6 мөл.солк. ылбыттара, 2015 с. – 2 мөл.солк. барыахтаах. Былырыын үүт субсидиятыгар 59,84 мөл.солк. ылбыттара. 2015 сылга былааннарын быһыытынан 3100 тонна үүтү туттахтарына, 92 мөл.солк. субсидия харчыта кэлиэҕэ. Билигин да ыарахан балаһыанньаҕа соҕотохтуу хаалларбат чинчилээхтэр.

Правительство отчуотун кэмигэр бары нэһилиэктэргэ бу боппуруоһу туруорсубуттара. Тыа хаһаайыстыбатын, ас-үөл политикатын миниистирэ Александр Артемьев маннык хоруйу биэрбитэ:

“Маай” кооперативы “тилиннэрэргэ” анал программаны үлэлэтиэхпит. Правительство хамыыһыйатын Петр Алексеев салайара сабаҕаланар. Чааһынай дьон үүт харчытын ыларын күүскэ хонтуруоллуохпут. Олунньу ый бүтүөр диэри үүт харчытын ылыаххыт. Манна олохтоох дьаһалта кыттыһан үчүгэйдик көрүөн-истиэн, хонтуруоллуон наада. Улуус дьаһалтата сөптөөх политиканы ыытар дии саныыбын. Быстах кэмҥэ үөскээбит ыарахан балаһыанньаны үлэ хаамыытынан быһаарыахпыт. Горнай улууһугар тыа хаһаайыстыбата сайдар кэскиллээх”.