Өрөгөйдөөх Кыайыы 70 сылын бэлиэтиир бу көрсүһүүгэ Өймөкөөн улууһун дьоно-сэргэтэ саамай ытыктыыр, киэн туттар кырдьаҕастара, ытыктабыллаах биир дойдулаахтара, тыыл ветераннара муһуннулар. Ил Түмэн депутата Василий Местников эмиэ да курус, эмиэ да үөрүүлээх бу сүдү суолталаах бырааһынньыгынан - сэрии бүппүтэ 70 сылын туолар үбүлүөйүнэн биир дойдулаахтарын, тыыл бэтэрээннэрин итиитик-истиҥник эҕэрдэлээтэ. Көрсүһүү кыттыылаахтара Аҕа дойду Улуу сэриититтэн эргиллибэтэхтэри, эйэлээх олох иһин сырдык тыыннарын толук биэрбит бары саллааттары чуумпуран туран кэриэстээтилэр. 

Норуот депутата биир дойдулаахтарын иннигэр тыл этиитин муус устар 27 күнүгэр буолан ааспыт Өрөспүүбүлүкэ күнүттэн саҕалаата. “Сахабыт сиригэр автономияны турууласпыт киэн туттар дьоммут Максим Аммосов, Платон Ойуунускай, Исидор Барахов биһиги, саха дьоно, сирдээх-уоттаах буолан ааппытын ааттатар, сайдар кэскиллээх Сахабыт сирин төрүттээбит күннэрин бэлиэтиир бырааһынньыгар кыттыбыппыт”, -- диэн туран Василий Местников сэбиэскэй норуот сэрии иннинээҕи олоҕуттан ахтан-санаан ааста. “Онтон саамай алдьатыылаах, элбэх хаан тохтуулаах сэрии саҕаламмыта, Сэбиэскэй Союһу утары Германия эрдэттэн бэлэмнэммит сэриини саҕалаабыта. 15 өрөспүүбүлүкэ холбоспут модун дойдута сэриигэ биир киһи курдук туруммута. Ити Улуу сэриигэ биһиги дьоммут хайдах курдук ыарахан кэмҥэ киһи өйүгэр баппат геройдуу, хорсун быһыыларынан Улуу Кыайыыны ситиспиттэригэр сүһүөхтээх бэйэбит сүгүрүйэбит”, -- диэн эттэ Василий Местников.

Норуот депутата билиҥҥи кэмҥэ Аҕа дойду сэриитигэр Кыайыыны араастаан хараарда, историяны уларытан суруйа сатааһыны сорунуулаахтык утарар наадатыгар тохтоото. Көрсүһүүгэ уоттаах сэриигэ барбыттартан бэрт аҕыйахтара төннөн кэлэн, урусхалламмыт дойдуну чөлүгэр түһэриигэ үлэлээбитэ. Ити туһунан этэригэр Василий Местников репрессияҕа суорума суолламмыттары санатан ааста. Ол курдук Өймөкөөн бастыҥ үлэһитэ И.В.Сталин төбөлөөх бастакы мэтээли ылан баран, “Бу кэриэтэ миэхэ бурдук биэртэрэ буоллар” диэн эппитин тыллаан биэрэннэр, сор суолламмыта ахтылынна. Норуот депутатын тыл этиитэ көрсүһүүгэ кэлбит тыыл бэтэрээннэригэр оччотооҕу кэм күүрээннээх үлэтин-хамнаһын бу баардыы санатта.

Василий Местников Россия уонна Саха сирин саҥа кэминээҕи олоҕун, ситиһиилэрин, баар итэҕэстэри, олохтоох салайыныы сайдыытын, атаҕар туруутун, арҕаа дойдулар киллэрбит санкцияларын, тыа хаһаайыстыбатын боппуруостарын киэҥник анааран, көрсүһүүгэ кэлбит тыыл, үлэ бэтэрээннэрин, биир дойдулаахтарын кытта санаатын үллэһиннэ.

Салгыы Ил Түмэн сис кэмитиэтин бэрэссэдээтэлэ сэрии кэнниттэн олоҕу-дьаһаҕы чөлүгэр түһэриигэ, сайыннарыыга күүстээх үлэни көрсүбүт көлүөнэ дьонугар, тыыл, үлэ бэтэрээннэригэр Кыайыы 70 сылынан парламент уонна норуот депутаттарын, тус бэйэтин аатыттан махтанна. “Россияҕа, ордук Саха сиригэр салгыы сайдарбытыгар төһө ис кыах баарый? Биһиги өрөспүүбүлүкэбит Российскай Федерация 85 регионуттан саамай сайдыылаах, үчүгэй көрдөрүүлээҕинэн киэн туттабыт Ол эрээри бэйэбит кыахпытын ситэ кыайан туһаммакка олоробут диэн этиэх тустаахпыт. Билигин олохтоох салайыныыга элбэх боломуочуйа бэриллэ турар. Бүгүн 389 тыа нэһилиэгэ бэйэтэ бюджеттаах. Ону туһанан манна олорор дьон бэйэлэрин күүстэрин, кыахтарын түмэн, үлэни өрө тутан, сайдар суолу тутуһуохтаахтар. Бэйэлэрин дьоннорун үлэлэтэн, хамнастаан, сирдэригэр дьиҥнээх хаһаайын буолан олоруох тустаахтар. Итини этэн тураммын ытыктабыллаах Өймөкөөнүм дьонун бу үөрүүлээх, өрөгөйдөөх Улуу Кыайыы күнэ кэлэн иһэринэн эҕэрдэлиибин. Бэйэ бэйэни өйөһөн, ыччаттарбытын үтүө суолга угуйа, такайа сылдьыҥ. Этэҥҥэ олоруҥ, доруобай буолуҥ!”, -- диэтэ Василий Местников.

Депутат бу тэрээһини тэрийиигэ улуус баһылыга Михаил Захаров көмөлөспүтүн бэлиэтээтэ итиэннэ улуус наҕараадаларын үөрүүлээх быһыыга-майгыга туттартаата. Бу күн тыыл бэтэрээннэрэ Октябрина Ивановна Заболоцкая-Хохлова, Клара Прокопьевна Дьячкова, Екатерина Прокопьевна Иванова, Аксинья Гавриловна Игнатьева, Зинаида Константиновна Атласова, Марфа Михайловна Петрова, Юрий Александрович Готовцев, Тамара Гаврильевна Северьянова “Кыайыы 70 сыла” үбүлүөйүнэй мэтээлинэн наҕараадаланнылар.

Ити курдук, тыыл бэтэрээннэрэ көрсүһүүгэ кэлэннэр Ил Түмэн депутатын Василий Местниковы, биир дойдулаахтарын кытта истиҥ быһыыга-майгыга үүттээх чэйдээх остуол тула олорон, ирэ-хоро сэһэргэстилэр, үлэ-хамнас ортотугар ааспыт үтүө кэмнэрин ахтан-санаан аастылар.

Көрсүһүү кыттыылаахтара бары бииргэ хаартыскаҕа түһэн, өймөкөөннөр киин куораттааҕы түмсүүлэрэ бэлэмнээбит ырыатынан, хоһоонунан доҕуһуоллатан, дуоһуйа сынньанан тарҕастылар.