Тулаайах оҕолор дьиэлэрин тутуута саҕаламмыт. Былааҥҥа хас да кварталы тутуу баар эрээри, олорго инфраструктура суоҕа үлэни атахтыыр. Оттон ол дьиэ сыанатын хас эмэ төгүл үрдэтэр.

Массыына суолун тупсаран оҥоруу боппуруостара быһаарыллыбыт. Короленко уонна Горькай уулуссалара саҥалыы көрүҥнэниэхтэрэ. 2016 сылга ыытыллар «Азия оҕолоро» Оонньуулары көрсө Ломоносов уулуссата асфалланыаҕа. Ярославскай уулуссата кэҥэтиллиэҕэ. Билибина, Яков Потапов, Курашов уулуссаларыгар тупсарыы үлэлэр ыытыллыахтара. «Бу барыта үс сыл иһигэр куорат суолун тупсарар кыаҕы биэриэҕэ», – диэн Айсен Николаев бэлиэтээтэ.

Көрүүтэ-истиитэ суох уу тиһиктэрэ, бөҕү наардыыр собуот тутуута эмиэ болҕомто киинигэр турдулар.

Киин куоракка өрөспүүбүлүкэ бас билиитигэр сылдьар сир учаастактара бааллар. Игорь Никифоров, сири көҥүлэ суох ылыы чахчылара баалларынан, Баай-дуол, сир сыһыаннаһыыларыгар министиэристибэни кытта чопчу кэпсэтиини ыытарга испииһэк оҥороллоругар көрдөстө. Оттон киин куорат баһылыга Айсен Николаев бас-баттах тутуулары күрдьэн иһэргэ эттэ.