«Россия таһымыгар бастакы улахан кыайыыбын бастакы тренербэр Петр Каженкиҥҥа анаабытым. Төрөөбүт Нөмүгүбэр дьарыктана сырыттахпына Чурапчытааҕы спорт оскуолатыгар барарга кини сүбэлээбитэ, - диэн кэпсиир  Максим Заморщиков. - Сотору Нальчик куоракка баран аан дойду чемпионатыгар бэлэмнэниэхтээхпит. Күрэхтэһиигэ күүстээх утарсааччыларбыт Иран уонна Япония спортсменнара буолаллар. Кинилэри кыайар туһугар сыралаһыахпыт».

Олоҕор холобур оҥостор киһитинэн кини олимпиада үс төгүллээх чемпионун Бувайсар Сайтиевы ааттыыр. «Б.Сайтиев чиэһи үрдүктүк туппут киһи. Кини албыннаабакка-көлдьүннээбэккэ, араас араллааны тардыбакка, күүһүнэн, өйүнэн уонна сатабылынан муҥутуур ситиһиилэммит киһи. Мин кыайыыларым ким да саарбахтаабат гына чиэһинэй буолалларыгар дьулуһабын», - диэтэ.

Эдэр спортмены өйүүр дьон элбэхтэр. Туох-ханнык иннинэ кини аҕата  Николай Заморщиков этэринэн, спортсмен ситэригэр-хоторугар биир дойдулаахтара кыттыһаллара олус наадалаах. «Мин Хаҥалас улууһун уонна Нөмүгү олохтоохторугар улаханнык махтанабын. Кинилэр мин уолум ситиһиитин кэтээн көрөллөр, кини туһугар «ыалдьаллар». Нөмүгүтээҕи килиэби астыыр собуот үлэһиттэрэ спортсмен үөрэнээччилэргэ анал стипендиялары олохтообуттара. Ый аайы 10 тыһ. солк. итинник стипендия быһыытынан Максимҥа биэрэллэр. Күрэхтэһиигэ барарга-кэлэргэ элбэх ороскуоттаах. Онон ити стипендия улахан көмөлтө», диэн эттэ кини.

Көрсүһүүгэ эдэр спортсмены олимпиец  Леонид Спиридонов арыаллыы сырытта. «Сыл аайы биһиги саҥаттан саҥа талааннары арыйабыт. Биһиэхэ көлүөнэлэр солбуһуулара баарын ол туоһулуур. Улуус республикаҕа да, дойдуга да саҥа чемпионнары үүннэрэр», - диир аатырбыт спортсмен.

Хаҥалас баһылыга  Юрий Зайцев  улууска оҕо спордун сайыннарыы инники күөҥҥэ тутулларын, аҥаардас үбүнэн-харчынан эрэ буолбакка, өй-санаа өттүнэн өйөөһүн, көҕүлээһин оҥоһуллара ордугун кини бэлиэтээтэ. «Биһиги Чурапчыга булгуччу бара сылдьыахпыт. Спортка эрэллэрбитин эрчийэр, үөрэтэр-такайар тренердэри кытта хайаатар да көрсүхпүт, сибээһи олохтуохпут», - диэтэ кини.

Бу нэдиэлэҕэ Максим Заморщиков саастыылаахтарын оҕо спортивнай оскуолатын иитиллээччилэрин кытта көрсүөҕэ.

Кулун тутарга Владикавказ куоракка көҥүл тустууга Россияҕа бастыыр иһин күрэхтэһии буолбута. Манна дойду араас муннугуттан 350 спортсмен кэлэн илин-кэлин түһүспүтэ, күөн көрсүбүтэ. Саха сириттэн тиийбит Максим Заморщиков кыһыл көмүс, оттон Петр Копылов уонна Виталий Эспек боруонса мэтээллээх дойдуларыгар эргиллибиттэрэ.