Бу күн театр оҕо саадын иитиллээччилэригэр  "Чебурашка доҕотторун мунньар", оскуола үөрэнээччилэригэр — Мария Обутова-Эверстова "Үрүҥ аттаах Үрүлү Бэргэн бухатыыр"этно-синтез спектаклы көрдөрүө, режиссер Валентина Якимец, оттон киэһэ улахан дьоҥҥо П. Ойуунускай "Кыһыл ойуун " спектаклын билиһиннэриэ.

Юрий Афанасьев 1997 сыллаахха Дьокуускайдааҕы культура уонна искусство коллеһын  "Этно-уус-уран айымньы" идэтин бүтэрбитэ. Бүтэрэн баран Танда уонна Бороҕон культуратын дьиэлэригэр фольклор специалиһынан үлэлээбитэ.  2002 сыллаахха Эдэр көрөөччү Театрыгар артыыһынан ылыллыбыта. Кини олус бэркэ тойуктуур, оһуохай этэр, хомуска оонньуур. Юрий Афанасьев Саха Республикатын культуратын туйгуна.

Театр сценатыгар кини маннык оруоллары толорбута: Ханньалба ("Оҕоҕо баҕарбыт"), күүстээх Уйбаан ("Хобороос хоһооно"), Отчут ("Кыһыл ойуун"), Үрүлү Бэргэн Бухатыыр ("Үрүҥ аттаах Үрүлү  Бэргэн бухатыыр"), Хаардьыт Бэргэн ("Биэс ынахтаах Бэйбэрикээн эмээхсин"), Күн Дьаархан ("Айыы Дьураҕастай"), Саад хаһаайына ("Гулистан аптаах саада"), харабыл ("Акаакый араллаана"), Дзидзо Таҥара( "Таро - добрый странник"), Балтараа сирэй ("Наара суох"), царь Салтан ("Сказка о царе Салтане") уонна да атыттары.

Юрий Афанасьев саха режиссердарын "Таттаам", "Закон есть закон", "Көмүөл"  уонна да атын киинэлэригэр оонньообута.

Ону таһынан кини элбэх аан дойдутааҕы уонна Россиятааҕы театральнай искусство фестивалларын уонна конкурстарын кыттыылааҕа.