Саха биир бастакы драматура Николай Неустроев «Тиэтэйбит» комедиятын аан бастаан 1924 сыллаахха режиссер П.Оросин театр сценатыгар таһаарбыта. Онтон 1945-46 сс. А.Петров, 1980-1981 сс. уонна 1990-1991 сс. В.Фомин режиссердаан туруорбуттара.

ХХI үйэҕэ киирэн баран Саха театрын сценатыгар хаттаан туруоруллубут комедияны көрөөччү сүргэтэ көтөҕүллэн көрүстэ. СӨ үтүөлээх артыыһа Дмитрий Михайлов режиссердаан туруорбут үлэтин көрө олорон, быардара быстыар диэри күлэн да, сүрүн дьоруой тиэтэйиититтэн тахсыбыт курус көстүүлэртэн харахтарын уутун соттон да ыллылар. Бу комедия сиэри таһынан тиэтэйэн, оруо маһы ортотунан омуннанан олоҕу огдолутуохха сөбүн Омуннаах Уйбаан холобура өссө төгүл санатта.

Комедияҕа театр хас да көлүөнэ артыыстара оонньоотулар. Бэҕэһээ аҕай «Хаһан даҕаны» испэктээкилгэ сүрүн оруолу толорбут РФ үтүөлээх, СӨ народнай артыыската Анна Кузьминаны кытары биир сценаҕа оонньообут эдэр артыыстарга үйэлэригэр умнубат дьоллоох түгэннэрэ үүннэ. Омуннаах Уйбааны – Роман Дорофеев, Аргыс киһини - Дмитрий Михайлов, Күөс Бүөтүрү СӨ үтүөлээх артыыһа Михаил Семенов, Марыынаны – СӨ үтүөлээх артыыһа Мария Николаева, Аллаах Алааппыйаны – СӨ культуратын туйгуна Ильяна Павлова, Огдооччуйаны – РФ, СӨ үтүөлээх артыыската Елена Сергеева-Румянцева, Маарыйаны – СӨ культуратын туйгуна Татьяна Легантьева, Моҕотой уолун – Илья Портнягин уо.д.а. оонньоотулар.

Көрөөччүлэр саҥа испэктээкил театр репертуарыгар бигэтик киирэригэр уонна гастроллуур биригэээдэлэр өрөспүүбүлүкэ улуустарын көрөөччүлэригэр көрдөрөллэригэр баҕара хааллылар.