Маннык этиини РФ социальнай көмүскэлгэ миниистирэ Максим Топилин утарда. «Оҕолорго харчыны кэмчилиир - бүтэһик дьыала», - диэбитин эмиэ бэчээт тиһиктэрэ тиэрдэллэр.

Россияҕа 5,5 мөлүйүөн дьиэ кэргэн маннык хапытааллаах. Мантан баһыйар үгүстэрэ үбү-харчыны олорор дьиэлэрин тупсарыыга ыыппыттара биллэр.

Ийэ хапытаала көдьүүстээх дьаһал буолбутун миниистир Максим Топилин бигэргэтэр. Ол курдук, кини эппитигэр олоҕурдахха, бу дьаһал саҥа олоххо киириитин саҕана, 2006 сылга оҕо төрөөһүнэ 33% эбиллибит эбит буоллаҕына, 2013 сылга эбиллии 50,6% диэри улааппыт. Бу сылларга көрдөрүү араастаһыыта 28%.

Ийэ хапытаалын дьиэ кэргэн дохуотуттан көрөн биэрэри өйүүр дьон аҕыйаҕа суохтар.

Холобур, Россия таһымыгар биллэр көстөр экономист Виктор Данилов государство оҕо ахсаанын эрэ элбэтэрэ сөбө суоҕун ыйар. «Саамай сүрүнэ иитиигэ ураты болҕомто ууруллуохтаах. Икки мөлүйүөн оҕо төрүүрүн ситиһиэхпит. Онтон биир мөлүйүөнэ олох дьэбэрэтигэр түспүт киһи буоллаҕына, государство улаханнык сүтэрэр» - диир кини.

Биллэн турар, Ийэ хапытаалын наадыйааччыга эрэ биэрэр буоллахпытына, ханнык критерийинэн, ирдэбилинэн салайтаран бу ыал наадыйааччы ахсааныгар киирэрин дуу, киирбэтин дуу баһаарабыт диэн ыйытык үөскүүрэ оруннаах.

Ийэ хапытаалын олорор дьиэни тупсарыыга, ийэ пенсиятыгар эбии гынарга, оҕо үөрэнэригэр ыытар туһунан халбаҥнаабат бэрээдэк баар. Бу тула эмиэ элбэх мөккүр баарын умнар сатаммат. Дьон оҕолордоох ийэ бэйэтэ үөрэнэригэр ыытары туруорсар эмиэ баар чахчы.

Аны оҕо үөрэҕин төлүүргэ Ийэ хапытаалын туһаныы мэһэйэ, моһуога олус элбэх. Холобур, үөрэх төлөбүрүгэр ийэ хапытаалын туһанаары гыннахха, докумуону хомуйуу ирдэбилэ сылын аайы уларыйа турар. Судургу буолуон оннугар, төттөрүтүн уустугурар. Эҥин-эгэлгэ моһоло эбиллэ, элбии турар.

Олоххо барыта баҕарбыт, санаабыт хоту буолбат. Оҕо ситэри үөрэммэккэ, үөрэҕин бүтэрбэккэ быраҕан кэбистэҕинэ, Ийэ хапытаалыттан төлөммүт харчы төннөрүллэр бэрээдэгэ үөрэх дуогабарыгар чуолкайдык уонна чопчутук суруллуохтаах диэн баар. Оттон үөрэх тэрилтэтэ барыта  итини өйөөбөт. Быһата, кэлбит харчыны төннөрүөн баҕарбат түгэнэ эмиэ баар эбээт. Маннык түгэҥҥэ быһыы-майгы хайдах быһаарыллыахтааҕа салгыҥҥа ыйанан хаалар дииргэ тиийэбит.