Поэт лааҕырга сылдьан “Полюс “диэн аатырбыт поэматын суруйбута. Манна Өймөкөөн тыйыс тымныыта, хаайыылаах ыар олоҕо ахтыллар. Бу айымньы уларыта тутуу кэмигэр эрэ киэҥ араҥаҕа бэчээккэ тахсыбыта.

Поэт Өймөкөөнтөн барбыта 56-с сылыгар -- 100 сыллаах үбүлүөйүгэр анал ыҥырыы тутан, Борис Ручьев аатын аанаан ааттаан, Өймөкөөн улууһун дьоно бу күннэргэ Магнитогорскай куоракка баран кэллилэр. Делегацияны Өймөкөөҥҥө ГУЛАГ лааҕырдарыгар репрессияҕа түбэспит поэттар уонна суруйааччылар литературнай музейдарын тэрийээччи РФ оскуолаларын үтүөлээх учуутала, Өймөкөөн улууһун Бочуоттаах гражданина Мария Боярова салайан сырытта. Кини көҕүлээһининэн Томтор орто оскуолатын иһинэн репрессияҕа түбэспит поэттары уонна суруйааччылары кэриэстиир музей үлэлиир.

Магнитогорскай куорат олохтоохторо Саха сириттэн тиийбит ыалдьыттары олус истиҥник көрүстүлэр. Хоту дойду кытыы нэһилиэгин олохтоохторо кинилэр биир дойдулаахтарын аатын үйэтитэ сылдьаллара Өймөкөөн уонна Урал быстыспат ситимнэрэ буолар диэн бэлитэтээтилэр.