«Сэтинньи 4 күнүгэр дойду норуоттар сомоҕолоһууларын күнүн  араастык бэлиэтээтэ. Биһиги предпринимателлэр Григорий уонна Артур Эмнары кытта Украинаттан Хатаска кэлэн олорор дьоҥҥо хаппыыста, моркуоп, чеснок, дьаабылыка, мандарин илдьэн биэрдибит. Дьон үөрүүтэ муҥура суох улахан», - диэтэ РФ уопсастыбаннай балаататын чилиэнэ Марина Богословская.

Сэрии иэдээниттэн куотан кэлбит дьон олорор сирдэриттэн тахсыбакка олохтоох бородууксуйаны оҥороллоругар Артур Эм этии киллэрдэ. «Көмөнү күүтэн олоруохтааҕар, манна оҥорон таһаарыыны тэрийиэҕиҥ. Остолобуойгутугар оҕуруот аһыттан араас кэнсиэрбэлэрин, полуфабрикаттары оҥоруоххутун сөп. Оҕолоргут да көрүүлээх-истиилээх буолуохтара», - диэтэ кини.

Украинаттан кэлбит дьон предприниматель ити этиитин олус сэҥээрбиттэр уонна тута ылыммыттар. «Дьоҥҥо «балыгы» буолбакка, үбү-харчыны хаптарар "күөгүнү" биэриэххэ наада», - диэтэ Артур Эм.