2015 сыллааҕы уонна 2016, 2017 сыллардааҕы, үс сыллаах Россия бюджета «уустук» диэн ааттанар. «Төһө да бюджет уустугун иһин, Россия ылынар кыахтаах. Аһаҕастык эттэххэ, маннааҕар чэпчэкитэ суох сыллары ааспыппыт. Инфляция таһыма үрдүү, экономика көрдөрүүтүн тэтимэ бытааннык өрө тахсар кэмигэр бюджет үөскэтиллиннэ. Ити биллэн турар, бюджет структуратыгар быһаччы дьайар», - диэн бу сотортааҕыта биэрбит интервьютугар РФ премьер-миниистирэ  Дмитрий Медведев этэн турар.

Федеральнай киин төһө да үбү-харчыны кытаанахтык кэмчилээбитин иһин, регионнарга дотацияны биэриини инники кирбиигэ тутар. Онон, регионнар бюджеттара тэҥ буолууларын хааччыйарга анаан дотация кээмэйин 10 млрд.солк. үрдэтэр туһунан этиини сенатордар  киллэрдилэр.

Саха сирин үпкэ министиэристибэтэ иһитиннэрбитинэн, 2015 сылга федеральнай бюджеттан 54 млрд солк. кээмэйдээх дотация бэриллиэхтээх. Ити суума 2016 сылга – 48 млрд 189 мөл., оттон 2017 сылга – 41 млрд 818 мөл. солк. буолуохтаах. 

Бу кырата суох, үгүөрү үп-харчы эрээри, өрөспүүбүлүкэ былааһа бэлиэтииринэн, сирбит-уоппут, климаппыт уратыттын ааҕыстахха, ситэритэ суох. Ити туһунан Егор Борисов Дмитрий Медведевы кытта көрсүһүүтүгэр чиҥэтэн эппитэ.