Күннээҕи бэбиэскэ сүрүн боппуруоһунан Дальнай Восток сирин-уотун социальнай-экономическай сайдыытын түргэтэтэр, орто болдьохтоох сайдыы региональнай уонна муниципальнай инвестиционнай программаларын оҥорор туһугар усулуобуйалары тэрийэр дьаһаллары дьүүллэһии буолла. Егор Борисов Саха сиригэр бары хайысхалары сайыннарар үлэ утумнаахтык ыытылларын бэлиэтээтэ. Билигин республика Дальнай Востогу сайыннарар государственнай программаҕа эрэ буолбакка, тус сыаллаах атын федеральнай программаларга эмиэ кыттар. Республика баһылыга улахан регион сиригэр-уотугар олоххо киллэриллэр бырайыактар Дальнай Востогу уонна Байкал регионун сайыннарар биир программа эрэ иһинэн толоруллуо суохтаахтар диэтэ. Манан сибээстээн, Егор Афанасьевич кэккэ бырайыактары сөптөөх федеральнай программаларга киллэрэр туһунан Юрий Трутневка этии киллэрдэ.
Егор Борисов «Социальнай-экономическай сайдыылара урутуохтаах сирдэр уонна Дальнай Восток регионнарын государство өттүттэн өйүүр атын дьаһаллар тустарынан» федеральнай сокуон барылын туһунан этэригэр Саха сирэ ону күүскэ дьүүллэһэрин уонна сокуону оҥорооччулар республика кэккэ этиилэрин номнуо учуоттаабыттарын эттэ.
Егор Афанасьевич саҥа сокуон оҥоһуллар кэмигэр номнуо туттулла сылдьар атын федеральнай сокуоннарга утарсыан сөптөөх түгэннэри туоратар наадатын ыйда. Холобур, Хотугу сир төрүт олохтоох аҕыйах ахсааннаах норуоттарын туһунан сокуон нуормалара балыктааһын туһунан сокуону кытта утарсыылаахтар этэ.
Егор Борисов тардыллар үлэ күүһүгэр квота биэрии ньымата саҥа сокуон барылыгар учуоттаныахтааҕын, Дальнай Востокка кэлии дьону тардыы усулуобуйата чуолкай буолуохтааҕын эттэ.
«Урутаан сайдыахтаах сирдэри тэрийиинэн дьарыктанар компаниялар салайар уорганнарын састаабыгар регионнар, муниципальнай тэриллиилэр бэрэстэбиитэллэрэ булгуччу киллэриллиэхтээхтэр. Бу нуорманы саҥа федеральнай сокуон балаһыанньаларыгар бигэргэтиэххэ наада», – диэтэ СР президенэ Егор Борисов.
Республика баһылыга урутаан сайдыахтаах сирдэр тустарынан федеральнай сокуон бүтүн Дальнай Восток социальнай-экономическай сайдыытын түргэтэтиигэ сүрүн суолталаах уонна көдьүүстээх инструмент быһыытынан наадалаах диэн түмүк оҥордо.
Ыстатыйаны 3 киһи көрдө.
Комментарии
Авторизация на сайте через социальные сети