Саха сирэ – Россия саамай бөдөҥ региона. Нэһилиэнньэлээх пууннар бэйэ-бэйэлэриттэн ыраахтара, тыйыс климаттааҕа, тырааныспар инфраструктурата ситэритэ суоҕа сорох кыра нэһилиэктэргэ аҕыйах үөрэнээччилээх оскуолалары үлэлэтэри ирдиир.

Рязань уобалаһыгар 2013 сыллаахха ыытыллыбыт РФ президенин президиумун сэбиэтин мунньаҕар үөрэх миниистирэ Дмитрий Ливанов эппитинэн, сэттэ сыл иһигэр - 2005-тэн 2012 сылга диэри дойду үрдүнэн оскуола ахсаана 18 тыһыынчанан аҕыйаабыт. Ити мунньахха Егор Борисов өрөспүүбүлүкэҕэ кэлиҥҥи уон сылга тыа сиригэр 103 саҥа оскуола, 106 доруобуйа харыстыбылын эбийиэктэрэ тутуллубуттарын эппитэ.

Тыа сирин оскуолаларыгар, ордук Арктикаҕа уонна уустук суоллаах-иистээх, ыраах сытар оройуоннарга интернет-сибээскэ улахан кыһалҕа баар. Оскуоланы бүтэрээччилэр биир кэлим государственнай экзамены туттаралларыгар ити кыһалҕа кырата суох харгыһы, мэһэйи үөскэтэр.

Егор Борисов «Газпром» компанияны кытта дуогабарга олоҕуран сотору кэминэн «Ямал» спутник үлэлиэхтээҕин эттэ. Спутник билигин аһаҕас космоска баар.

Саҥа спутник ханаала да баар  кыһалҕаны толору быһаарары мэктиэлээбэт. Егор Афанасьевич 2015 сылга биир кэлим экзамеҥҥа бэлэмнэниигэ Арктика уонна ыраах сытар улуустары интернетинэн түргэн  сибээһи хааччыйары туруоруста.

«Өрөспүүбүлүкэҕэ билигин 600-тэн тахса оскуола интернеккэ холбонно, техническэй биричиинэлэринэн ордук хоту улуустарга кыһалҕалар бааллар», - диэтэ Егор Борисов.

Онлайн-режимҥэ хонтуруолу олохтуур уустук. Егор Афанасьевич эппитинэн, маннык онлайн-хонтуруол 34 эрэ бырыһыанын хааччыйар кыахтаахпыт. Оттон ирдэбилгэ ыйылларынан, бу көрдөрүү 80% буолуохтаах.

Ыраах сытар оройуоннарга КИМ (Контрольно-измерительные материалы) тиэрдэр уустугун Е.Борисов эттэ. Быһыллыбыт, хаарчахтанар болдьоххо интернет бытаанынан атын параметры олохтуур ордугун кини бэлиэтээтэ.

Дмитрий Медведев Саха сиригэр элбэхтэ сылдьыбыта, биһиги өрөспүүбүлүкэбит уратытын үчүгэйдик билэр. Онон Егор Афанасьевич этиитин толору өйөөтө. РФ үөрэххэ миниистиригэр Дмитрий Ливановка туһаайан онлайн-режимҥэ дойду, чуолаан Саха сирин уратыта аахсыллыахтааҕын бэлиэтээтэ.