Тыа хаһаайыстыбатын улуустааҕы управлениетын начальнига Иван Аргунов: "Егор Борисов Саха сирин автономията тэриллибитэ 100 сылын бэлиэтээһин Россия таһымыгар улахан бэлиэ даата буоларын тоһоҕолоон бэлиэтээтэ. Тыа сирин сайдар хайысхата чопчуланна. Ол курдук, үүтү туттарыы сыанатын үрдэтии, федеральнай, республикатааҕы программаларынан олорор дьиэни тутуу, ыччаты тыа сиригэр олохсутан, үлэни-хамнаһы бэйэлэрэ тэрийэллэрин ситиһии, олорор дьиэлэри кииннэммит ититэр тиһиккэ холбооһун туһунан эппитэ кэрэхсэбиллээх. Итирдэр утахтары атыылааһыны бэрээдэктээһин, салалта эйгэтигэр саҥалыы толкуйдаах эдэр дьону таһаарыы, маассабай иһитиннэрэр-биллэрэр эйгэ аһаҕас, чиэһинэй буолуутун туһунан, о.д.а санааларын биһирээтим".

Үөрэх управлениетын салайааччытын солбуйааччы Николай Тарасов: "СР Ил Дархана бэйэтин этиитигэр 2014 сыл сүрүн бэлиэ түгэннэригэр уонна 2015 сылга республика олоҕун-дьаһаҕын сайыннарыы хайысхаларыгар тохтоото. Ол курдук, 2014 сыл Арктика сылынан сайдыы тосхоллорун, Култуура сылыгар республикаҕа култуура сокуона оҥоһуллуутугар үлэ саҕаламмытын, Саха сирин автономиятын 100 сылын үөрүүлээхтик бэлиэтээһини, 2015 сыл Литература сылынан биллэриллибитинэн сибээстээн республикаҕа тыл политиката сайдарын, Улуу Кыайыы 70 сылын республика олохтоохторо чиэстээхтик көрсүөхтээхпитин бэлиэтээн эттэ. Экономика уонна үп-харчы боппуруостарын таарыйан Саха сиригэр транспортнай-логистическай тиһик сайдыытыгар тохтоото уонна ити республика экономиката туруктаах буолуутугар суолтатын ыйда. Дьоҕус уонна орто бизнеһи өйөөһүн, тутууну ыытыы, кадастровай уонна государственнай регистрация судургутуллуохтаахтарын бэлиэтээтэ. Тыа сирин сайыннарыы государственнай программаларга олоҕуран салгыы ыытыллыахтаах диэтэ, тыа сирин предпринимателлэрин өйөөһүн, үүтү туттарыы сыанатын үрдэтии, бэйэбит бородууксуйабытынан хааччыйыы барыахтааҕын туһунан эппитэ кэрэхсэбиллээх. Хаарбах туруктаах дьиэлэри суох оҥоруу, чааһынай дьиэлэри тутууну өйөөһүн, тыа сиригэр үлэлиир специалистарга уопсай дьиэлэри "Үтүө дьыала" чэрчитинэн туттарыы, дьиэлэри киин ититэр тиһиккэ холбооһун туһунан эппитин уонна сир баайын хостооһуҥҥа үлэлиир тэрилтэлэр тулалыыр эйгэни харыстыыр программалаах буолуохтаахтарын ирдиир соругу туруорбутун сөбүлүү иһиттим".