- СИА-ҕа Дьокуускай куорат дьаһалтатыттан иһитиннэрбиттэринэн, маршруттара ыйыллыбатах ПАЗ автобустар куорат кииниттэн Хатас бөһүөлэгэр диэри сылдьаллар. Бу иннинэ бөһүөлэк остуолбаларыгар сэтинньи 24 күнүттэн «Хатас – 202-с мкр» коммерческай маршрут аһылларын туһунан биллэриилэр сыһыарыллыбыттар.
- «Бу маршрут аһылларыгар сөбүлэҥ бэриллибэтэҕэ, биир да хонтуруоллуур уоргантан көҥүл ылыллыбатаҕа. Чааһынай автобустар бигэргэммэтэх маршруттара пассажирдары таһар транспорт үлэтин атахтыыр», – диэн эттэ киин куорат уокуруктааҕы дьаһалтатын предпринимательствоҕа, туризмы, транспоры сайыннарыыга департаменын салайааччытын э.т. Максим Сыромятников.
- Маннык автобустартан пассажирдары таһыы графига кэһиллэр, тохтобулларга мэһэйдэр үөскүүллэр, ноҕурууска улаатар, маны сэргэ көҥүлэ суох маршрукка пассажир куттала суох айанныыра мэктиэлэммэт.
- Куорат дьаһалтата массыына суолун хонтуруоллуур управлениеҕа, ГИББД-га көҥүлэ суох маршрутунан сылдьар автобустары бэрэбиэркэлииллэригэр сурук ыытта.
- «Манна атын маршруттар автобустара кыттыгастаахтара билиннэҕинэ, кинилэри кытта дуогабары көтүрэр туһунан боппуруоһу туруоруохпут», – диэн Максим Сыромятников бэлиэтээтэ.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети