Мас тардыһыы уон сыл иһигэр Россияҕа эрэ буолбакка, дойду таһыгар кытары билиниини ылла. 2010 сыллаахха FILA уонна «Сахаада-спорт» Саха сирин норуоттарын оонньууларын уонна спорт национальнай көрүҥнэрин ассоциациятын сөбүлэһиилэригэр олоҕуран, Тустуу араас көрүҥнэрин аан дойдутааҕы холбоһуктаах федерацията (FILA) мас тардыһыыны официальнайдык билиммитэ.

Мас тардыһыыга аан дойду бастакы чемпионата Саха сирин норуоттарын спорт национальнай көрүҥнэрин сайыннарыы, тэнитии биир түһүмэҕинэн уонна Саха Республикатын, Российскай Федерация имиджин көтөҕүүнэн буолар.

Тэрээһиҥҥэ спонсордар, тэрийээччилэр, наука уонна общественность деятеллэрэ, суруналыыстар, судьуйалар, тренердэр ыҥырыллан сылдьыбыттара. Спорт министрэ Михаил Гуляев спорт национальнай көрүҥнэрин сайыннарыыга өҥөлөрүн иһин түөскэ кэтиллэр бэлиэлэри, махтал суруктары, мас тардыһыыга аан дойдутааҕы федерация кубоктарын туттартаата.