«Мас тардыһыы туһунан доҕорбуттан Халка Хогантан аан бастаан истибитим. Манна кэлэрбэр кини сүбэлээбитэ», - диэн эттэ «Аан дойду саамай күүстээх киһитэ» ааты түөрт төгүл сүкпүт спортсмен.

«Мас тардыһыытын күрэхтэһиитигэр биһиги бу бастакы сырыыбыт. Биһиэхэ манныкка атылыы национальнай көрүҥнээхпит, ол эрээри мас тардыһыыта биһиэхэ сонун көрүҥ. Онно холонон, бэйэбитин тургутунан көрүөхпүт», - диэтэ Магнус вер Магнуссон уонна спортсменнар аан дойду чемпионатыттан үтүө өйдөбүллээх эргиллэн Исландияҕа мас тардыһыыны сайыннарыахтарыгар эрэнэрин биллэрдэ.

Исландия хамаандатын бэрэстэбиитэлэ эппитинэн, викиннэр сыдьааннара чемпионакка биир мэтээлгэ суоттаналлар: номнуо «Триумф» комплекска эрчиллэ сылдьар Сору Сорстейндотердарыгар эрэллэрэ улахан эбит.

Мас тардыһыытыгар аан дойду чемпионата өйүүн саҕаланар. Билигин Саха сирин киин куоратыгар спортсменнары сэргэ спорду сайыннарыы специалистара кэлитэлээн эрэллэр. Чемпионат чэрчитинэн, мас тардыһыыга аан дойдутааҕы федерация исполкомун мунньаҕа, конгреһа уонна научнай-практическай конференция буолуохтара.