«Биһиги Саха сирин бары өттүнэн өйөбүлүн иһин махтанабыт. Мас тардыһыыга бастакы аан дойду чемпионатын чэрчитинэн араас дьаһаллар ыытыллыбыттара, ол иһигэр дойдулар икки ардыларынааҕы форум уонна научнай-практическай конференция», - диэтэ мас тардыһыыга дойдулар икки ардыларынааҕы федерация президенэ Александр Акимов.

Кини бэлиэтээбитинэн, республика баһылыга Егор Борисов спорт сайдыытыгар киэҥ өрүттээх үлэни ыытар, ол иһигэр спортивнай обьектар тутуллаллар, материальнай-техническай база бөҕөргүүр. Ити үтүөлэрин иһин дойдулар икки ардыларынааҕы федерация чилиэннэрэ Егор Борисовы бэйэлэрин бочуоттаах президеннэринэн ааттаатылар.

«Саха сиригэр спорду куруутун өрө туталлара. Мас тардыһыынан баҕалаах барыта дьарыктаныан сөп уонна бу көрөргө сүрдээх интэриэһинэй, иһигэр элбэх кистэлэҥнээх. Биһиги бу спорт көрүҥүн аан дойду таһымыгар сайыннарарга бэлэммит», - диэн эттэ Егор Борисов.