Кини иэйиитэ хотонугар ынаҕын ыы олордоҕуна киирэр. Күнү быһа иистэнэ олорор буолан, көхсө да сааллара, сылайара ханна барыай?

- Ынахпын ыы олорон өрүү ииспин саныыбын: салгыы тугу киллэрэн биэриэхпин, ханнык өҥү дьүөрэлиэхпин сөбүй диэн. Санаабын сааһылаан баран, дьиэбэр киирэн, саҥа толкуйбун лиискэ уруһуйдуу охсобун. Дьэ, уонна салгыы үлэлээн барабын, -- диэн кэпсиир мин сэһэргэһээччим.

Кини кимий? Хаҥалас улууһун Тойон Арыытын олохтооҕо, иискэ норуот уус-уран оҥоһугун маастара Вера Варфоломеева. Норуот маастара былырыын ахсынньы ыйга ыытыллыбыт Москватааҕы “Этно-Эрато” Үрдүкү муода 2-с Евразийскай национальнай көстүүм күөн күрэһэр “Сибиир уонна Уһук Илин бастыҥ көстүүмэ” диэн номинацияҕа бочуоттаах үһүс миэстэни ылбыт. Маннык дойду таһымнаах улахан ааттаах-суоллаах куонкурустарга миэстэлэһэр киһи, төрөөбүт Сахатын сирин күөн күрэстэрин тулутуо дуо – өрүү инники кэккэҕэ сылдьар буоллаҕа! Ол курдук, Мииринэй, Горнай, Хаҥалас улуустарыгар ыытыллыбыт Олоҥхо ыһыахтарыгар тэҥнээҕин булбатаҕа, Ньурба ыһыаҕар иккис миэстэлээх.

- Олоҥхо ыһыахтарыгар анаан бэлэмнэнэбин – биирдии сону хайаан да тигэбин. Ат симэҕин эмиэ бэлэмниибин. Сунтаарга Олоҥхо ыһыаҕар “Лэпсэ” толору ат симэҕин оҥорон төрдүс миэстэҕэ тиксибитим. Икки “лэпсэбин” национальнай худжественнай музей атыыласпыта, - диэн кэпсиир Вера Семеновна.

Норуот маастара олохтоохтук иистэнэрин 2009 сылтан саҕалаабыт. Кини сылга иккилии улахан үлэни оҥорор.

-- Ис испиттэн тартаран иистэнэбин. Ас астыырым икки ардыгар буоллун, хотоҥҥо үлэ буоллун -- туох баар өйүм-санаам барыта ииспэр түмүллэр. “Иис наһаа сылаалаах, сылайбаккын, салгыбаккын дуо?” – диэн ыйытааччылар. Айар үлэ абылаҥар ылларбыт киһи, ордук сынньанабын. Кэргэним – гармонист. Аттыбар кэлэн баяныгар оонньоон, бэйэтин да сылаатын таһаарар, миигин да аралдьытар. Иккиэн айар куттаах дьоммут, -- диэт, норуот маастара ис иһиттэн мичээрдээн ылар.

Вера Варфоломеева ынах ыы олорон санаабыт санаатын кини көмүс тарбаҕа олоххо киллэрэн, кыбытыылаах тигии ньыматынан тикпит оҥоһуктара, бууктаах, кытыылаах сонноро Испанияҕа, Францияҕа, Болгарияҕа, Москваҕа, Хабаровскайга, Бишкеккэ, Санкт-Петербурга ааттаах-суоллаах быыстапкаларга көрдөрүүгэ туруоруллубуттара. Санкт-Петербурга ыытыллыбыт Бүтүн Россиятааҕы “Лоскутная мозаика” диэн куонкуруска “Хаачыстыбалаах ииһи муҥутуурдук баһылааһын” диэн номинацияҕа үс бастыҥ үлэҕэ кини аата дорҕоонноохтук ааттанан, норуот маастара Вера Варфоломеева быйыл күһүн Францияҕа ыытыллар аан дойдутааҕы быыстапкаҕа эмиэ ыҥырыллыбыт.

Дьэ, ити курдук саха дьахтарын өйө-санаата тиэргэнин иһигэр түмүллэн, кини иистэнэр ииһэ улахан быыстапкаларынан аан дойдуну тилийэ көтө “айанныыр”. Ол кэмҥэ дьиэ хаһаайката ынаҕын ыы олорон эмиэ:“Салгыы тугу киллэрэн биэриэхпин, ханнык өҥү дьүөрэлиэхпин сөбүй?” – диэн толкуйга ылларан олорор буолар...