Абый улууһун ааҕааччыларыгар Саҥа дьыллааҕы дьоһун бэлэх

Ахсынньы ыйга Абый улууһунааҕы «Хотугу кыым» хаһыат редакциятын историятыгар биир бэлиэ түгэн буолла — манна аныгы бэчээттиир оборудование туруоруллан, бу күҥҥэ диэри А4 форматынан тахса турбут хаһыат кээмэйэ улаатта, бэчээт хаачыстыбата биллэ тубуста. Онон хотугу улуус олохтоохторун, суруналыыстарын, полиграфистарын үөрүүлэрэ муҥура суох.


Оборудованиены Арктика сылынан СР Бэчээккэ, радионан, телевидениенэн биэриилэргэ департамена (Николай Молчанов) ылан биэрдэ. Утары төлөбүрүн улуус дьаһалтата (Михаил Никулин) уонна хаһыат редакцията кыттыһан уйуннулар. Саҥа тэрили КопирТехСервис (Александр Тарасов) тэрилтэ үлэһиттэрэ таҥнылар, хайдах көрөн-истэн үлэлэтэри сүбэлээтилэр-амалаатылар.
Бу иннинэ ыраах сытар нэһилиэктэр, улуус дьаһалтата принтер ылан биэрэн, хаайтарыы кэмигэр хаһыаты бэйэлэрэ миэстэтигэр бэчээттиир буола сылдьыбыттара. Хаһыаты тарҕатыы маннык ньыматын тобулан сурутааччыларын ахсаана 100-чэкэ киһинэн эбиллибитэ.
«Ааҕааччыларбыт хаһыаппыт кээмэйэ кыратын уруккуттан үҥсэргииллэрэ. Онон маннык уларыйыы бастатан туран кинилэргэ - хаһыаппыт эрэллээх доҕотторугар ананар. Мантан инньэ сайдыыны кытта тэҥҥэ хаамсан эбии сыһыарыылары, анал балаһалары бэлэмнээн ааҕааччыларбытын үөрдэр былааннаахпыт. Ону кытта сурутааччыбыт ахсаана элбиэҕэр эрэнэбит. Түгэнинэн туһанан Бэчээт департаменыгар, улуус дьаһалтатыгар уонна куруутун ыкса бииргэ үлэлэһэр КопирТехСервис тэрилтэ үлэһиттэригэр хаһыат ааҕааччыларын ааттарыттан махталбын тиэрдэбин», - диэн сонунун үллэстэр «Хотугу кыым» директор-редактора Сусанна Никитина.